திருவண்ணாமலை: திருவண்ணாமலை அருணாசலேஸ்வரர் கோவிலில், தீப திருவிழா பந்தக்கால் முகூர்த்தம் நடந்தது.

திருவண்ணாமலை அருணாசலேஸ்வரர் கோவிலில் நவ., 10ல், தீப திருவிழா கொடியேற்றத்துடன் தொடங்கி, நவ., 16ல், மகாரத தேரோட்டம், 19ல், 2,668 அடி உயர மலை உச்சியில் மகா தீபம் ஏற்றப்பட உள்ளது. விழா பூர்வாங்க பணிகள் தொடங்க நேற்று காலை, 5:40 மணிக்கு சிம்ம லக்னத்தில் பந்தக்கால் முகூர்த்தம் நடந்தது. இதை முன்னிட்டு, சுவாமி தங்க கொடி மரத்தின் அருகே உள்ள சம்மந்த விநாயகருக்கு, சிறப்பு அபிஷேகம், பூஜை நடத்தப்பட்டு பந்தக்காலிற்கு அபிஷேகம் செய்யப்பட்டது.  பின்னர், சிவாச்சாரியார்கள் வேதமந்திரம் முழங்க, ராஜகோபுரம் எதிரில் பந்தக்கால் நடப்பட்டது. நிகழ்ச்சியில் கோவில் இணை ஆணையர் அசோக்குமார் உள்ளிட்ட பலர் கலந்து கொண்டனர்.  இதையடுத்து வாகனங்கள் பழுது பார்த்தல், வர்ணம் பூசுதல், அழைப்பிதழ் அச்சடித்தல், தேர் பழுது பார்த்தல் உள்ளிட்ட அனைத்து பூர்வாங்க பணிகள் தொடங்க உள்ளது. கொரோனா பாதிப்பு காரணமாக, கடந்தாண்டு தீப திருவிழாவில், சுவாமி மாட வீதி உலா ரத்து செய்யப்பட்டு, கோவிலின் ஐந்தாம் பிரகாரத்தில் வலம் வந்து பக்தர்களுக்கு அருள்பாலிக்கும் நிகழ்வு நடந்தது. மகா தீபத்திற்கு, கோவிலினுள் பக்தர்கள் அனுமதிக்கப்படவில்லை.