திருக்கோஷ்டியூர் : திருப்புத்துார் பகுதியில் புரட்டாசி சனிக்கிழமையன்று அரசு கொரோனா கட்டுப்பாடு வழிகாட்டுதலின் படி பெருமாள் கோயில்கள் திறக்கவோ, சுவாமி தரிசனத்திற்கோ அனுமதியில்லை என தெரிவித்துள்ளனர். இப்பகுதியில் அதிகாலையில் கோயில் நடை திறந்து திருக்கோஷ்டியூர் சவுமியநாராயணப்பெருமாள் கோயிலில் உற்ஸவர் அலங்காரத்தில் எழுந்தருளலும், கொங்கரத்தி வண்புகழ் நாராயணப்பெருமாள் கோயிலில் சிறப்பு அலங்காரத்தில் பெருமாள் எழுந்தருளலும் தீபாராதனையுடன் பக்தர்கள் சுவாமி தரிசனம் புரட்டாசி சனியன்று நடைபெறும். காலை துவங்கி மாலை வரை பக்தர்கள் வருகை காணப்படும். சிறப்பு பஸ்களும் இயக்கப்படும். ஆனால் தற்போது கொரோனா கட்டுப்பாடு விதிப்படி வெள்ளி, சனி, ஞாயிறுகளில் பக்தர்கள் சாமி தரிசனம் செய்ய அனுமதியில்லை. திருக்கோஷ்டியூர் போலீசார் புரட்டாசி சனி அன்று கோயில் நடை திறக்க அனுமதியில்லை என்று கோயில் நிர்வாகத்திடம் தெரிவித்துள்ளனர்.