பழநி: பழநி முருகன் கோவிலில் தைப்பூசத் திருவிழா ஜன.12ல் துவங்கி ஜன.21 வரை நடைபெற உள்ளது. இதில் முக்கிய நிகழ்ச்சியாக ஜன.17 ல் திருக்கல்யாணம், ஜன.18 ல் தைப்பூசத் தேரோட்டம் நடக்கிறது.

பழநி தைப்பூசத் திருவிழா ஜன.,12 ல் கிழக்கு ரத வீதியில் உள்ள பெரியநாயகி கோயிலில் கொடியேற்றத்துடன் துவங்குகிறது. அன்று காலை 6:45 மணிக்கு மேல் காலை 7:30 மணிக்குள் மகர லக்னத்தில் கொடியேற்றம் நடைபெறும். திருக்கல்யாணம்: விழாவில் ஆறாம் நாளில் (ஜன.17) முக்கிய நிகழ்ச்சியான வள்ளி,தெய்வ நாயகி அம்மன் சமேத முத்துக்குமார சுவாமி, திருக்கல்யாணம் மாலை 5:00 மணிக்கு மேல் மாலை 5:50 மணிக்குள் மிதுன லக்கினத்தில் நடைபெற உள்ளது. ஏழாம் நாளான ஜன.,18 ல் மாலை 4.15 மணிக்கு மேல் திருத்தேரில் சுவாமி ரத வீதிகளில் வலம் வருவார். திருவிழாவில் அனைத்து நாட்களிலும் வள்ளி தேவசேனா சமேத முத்துக்குமாரசாமி சிறப்பு அலங்காரத்துடன் பல்வேறு வாகனங்களில் திருவீதி உலா நடைபெறும். பத்தாம் நாளான ஜன.21ல் மாலை 7:00 மணிக்கு தெப்பத்தேர் நடைபெற்று, இரவு 11:00 மணிக்கு மேல் கொடி இறக்குதலுடன் உற்சவம் நிறைவு பெறும். விழா ஏற்பாடுகளை இணை ஆணையர் நடராஜன், உதவி ஆணையர் செந்தில்குமார் செய்கின்றனர்.