நாகர்கோவில்: சுவாமி விவேகானந்தர் நினைவு தினத்தையொட்டி கன்னியாகுமரி விவேகானந்தா கேந்திராவில் நடைபெற்ற அன்னபூஜையில் திரளான பெண்கள் பங்கேற்றனர். சுவாமி விவேகானந்தர் 1902-ம் ஆண்டு ஜூலை நான்காம் தேதி மகா சமாதி அடைந்தார். அவரது 120-வது நினைவு தினத்தையொட்டி கன்னியாகுமரி விவேகானந்த கேந்திர ஏக்நாத் அரங்கத்தில் இன்று காலை அன்ன பூஜை நடந்தது. கன்னியாகுமரி, திருநெல்வேலி, தூத்துக்குடி, சிவகங்கை, ராமநாதபுரம் மாவட்டங்களில் உள்ள பொதுமக்களிடம் இருந்து விவேகானந்த கேந்திர கிராம முன்னேற்றத் திட்ட தொண்டர்களால் நன்கொடையாக பெறப்பட்ட அரிசியை குவித்து வைத்து அன்னபூரணி சிலை வைத்து மலர்ளால் பூஜை நடைபெற்றது. அகில பாரத விவேகானந்த கேந்திர தலைவர் பாலகிருஷ்ணன் தலைமை வகித்தார்.தேசிய இணைப் பொதுச் செயலாளர் ரேகா தவே குத்துவிளக்கு ஏற்றி அன்னபூஜையைத் தொடங்கி வைத்தார். கிராம முன்னேற்ற திட்ட செயலாளர் ஐயப்பன் வரவேற்றார். கேந்திரா தேசிய பொதுச்செயலாளர் பானுதாஸ், துணைத் தலைவர் நிவேதிதா வாழ்த்தி பேசினார்கள். அதைத் தொடர்ந்து குவித்து வைக்கப்பட்டிருந்த அரிசிக்கு மங்கள ஆரத்தி நடத்தப்பட்டது.விவேகானந்த கேந்திர ஆயுட்கால தொண்டர் என்.கிருஷ்ணமூர்த்தி ஆசியுரை வழங்கினார். ராமநாதபுரம் மாவட்டபொறுப்பாளர் சகுந்தலா கேந்திர பிரார்த்தனை பாடல்களை பாடினார். பரமகுரு நன்றி கூறினார். இதில் திரளான பெண்கள் பங்கேற்றனர்.