பரமக்குடி: பரமக்குடி சுந்தரராஜ பெருமாள் கோயில் ஆடி பிரம்மோற்ஸவ விழா நேற்று முன்தினம் அனுக்கை, வாஸ்து சாந்தியுடன் துவங்கியது.

இதன்படி நேற்று காலை 9:30 மணிக்கு கோயில் கொடி மரத்தில் கருட கொடியேற்றப்பட்டது. தொடர்ந்து கொடி மரத்திற்கு சிறப்பு அபிஷேகங்கள் நடந்து, பெருமாள் ஸ்ரீதேவி, பூதேவி தாயாருக்கு தீப, சோடச  ஆராதனைகள் காண்பிக்கப்பட்டன. இரவு 7:00 மணிக்கு பெருமாள் மோகினி அவதாரத்துடன் அன்ன வாகனத்தில் வீதி வலம் வந்தார். தொடர்ந்து தினமும் பெருமாள் காலை, மாலை சிம்ம, சேஷ, கருடன்,  அனுமன் வாகனங்களில் வீதி வலம் வருகிறார். மேலும் ஆக., 8 அன்று இரவு 7:00 மணிக்கு பெருமாள் யானை வாகனத்தில் எழுந்தருளி ஆண்டாளுக்கு மாலை மாற்றுதல் நிகழ்ச்சி நடக்க உள்ளது.  மறுநாள் பூ பல்லாக்கு, ஆக., 10 நவநீத கண்ணன் திருக்கோலம் மற்றும் குதிரை வாகனத்தில் எழுந்தருளுகிறார். ஆக., 11 காலை 9.30 மணிக்கு மேல் ஸ்ரீதேவி, பூதேவி சமேத பெருமாள் தேரில் எழுந்தருளி  ரத வீதிகளில் வலம் வருகிறார். ஏற்பாடுகளை சுந்தரராஜ பெருமாள் தேவஸ்தான டிரஸ்டிகள் செய்துள்ளனர்.