செஞ்சி: செத்தவரை மோன சித்தர் ஆசிரமத்தில் நடந்த சிவஜோதி மோன சித்தர் அவதார திருநாள் விழாவில் திரளான பக்தர்கள் கலந்து கொண்டனர்.

விழுப்புரம் மாவட்டம், செஞ்சியை அடுத்த செத்தவரை – நல்லான்பிள்ளை பெற்றாள் கிராமத்தில் உள்ள சிவஜோதி மோன சித்தர் ஆசிரமத்தில் நேற்று சிவஜோதி மோன சித்தர் அவதார திருநாள் விழா நடந்தது, இதை முன்னிட்டு அதிகாலை 4 மணிக்கு மங்கள இசையும், 5 மணிக்கு கோ பூஜையும், 6 மணிக்கு சொக்கநாதர் மீனாட்சி அம்மனுக்கு சிறப்பு அபிஷேக அலங்காரமும். மகா தீபாராதனையும் நடந்தது. காலை 7 மணிக்கு 18 சித்தர்களுக்கு ஏக தின மகா ஹோமமும், 11 மணிக்கு சிவனடியார் பூஜையும், தொடர்ந்து சிவஜோதி மோன சித்தருக்கு கலசாபிஷேகமும், 1 மணிக்கு புஷ்பாபிஷேகமும், 1.30 மணிக்கு மகேஸ்வர பூஜையும் நடந்தது. இதில் சிவஜோதி மோன சித்தர் பக்தர்களுக்கு அருளாசியும், பிரசாதமும் வழங்கினார். இதில் சிறுபான்மையினர் நலத்துறை அமைச்சர் மஸ்தான் மற்றும் புதுச்சேரி, திருவண்ணாமலை, விழுப்புரம், செஞ்சி, திருக்கோவிலூர் மற்றும் வெளிநாட்டு பக்தர்களும் திரளாக கலந்து கொண்டனர்.