செஞ்சி: மேல்மலையனுார் அங்காளம்மன் கோவிலில் நேற்று நடந்த மார்கழி மாத அமாவாசை ஊஞ்சல் உற்சவத்தில் ஆயிரக்கணக்கான பக்தர்கள் குவிந்தனர். விழுப்புரம் மாவட்டம் மேல்மலையனுார் அங்காளம்மன் கோவிலில் நேற்று இரவு மார்கழி மாத அமாவாசை ஊஞ்சல் உற்சவம் நடந்தது. காலை 4 மணிக்கு அம்மனுக்கு சிறப்பு அபிஷேகம், வெள்ளி கவச அலங்காரம், விசேஷ அர்ச்சனை நடந்தது. இரவு 10.30மணிக்கு மாரியம்மன் அலங்காரத்தில் அங்காளம்மன் ஊஞ்சல் மண்டபத்தில் எழுந்தருளினார்.

கூடியிருந்த ஆயிரக்கணக்கான பக்தர்கள் கற்பூரதீபமேற்றி அம்மனை வரவேற்றனர். தொடர்ந்து பூசாரிகளும், பக்தர்களும் அம்மன் பக்தி, தாலாட்டு பாடல்களை பாடினர். இதில் வடக்கு மண்டல ஐ.ஜி., கண்ணன், எஸ்.பி., ஸ்ரீநாதா, கலெக்டர் மோகன், இந்து சமய அறநிலையத்துறை உதவி ஆணையர் ஜீவானந்தம் அறங்காவலர் குழு தலைவர் சந்தானம் மற்றும் அறங்காவலர்கள், கோவில் ஊழியர்கள் கலந்து கொண்டனர். இந்த மாதம் 2 நாட்கள் அமாவாசை தொடர்ந்த நிலையில் 22ம் தேதி இரவே ஏராளமான பக்தர்கள் வந்து சென்றனர். நேற்று கடும் பனிப்பொழிவும், குளிர் காற்றும் நிலவியது. இரவு 10 மணி வரை பக்தர்கள் கூட்டமும் குறைவாக இருந்தது. 10 மணிக்கு பிறகு திடீரென கூட்டம் மளமளவென குவிய துவங்கியது. இரவு 12 மணியளவில் பனியையும் பொருட்படுத்தாமல் ஆயிரக்கணக்கில் பக்தர்கள் கோவில் வளாகம் முழுவதும் நிரம்பி வழிந்தது.