நாகப்பட்டினம்: நாகை அடுத்த வேளாங்கண்ணி ஆரோக்கியமாதா தேவாலயத்தில் நடைபெற்ற கிறிஸ்துமஸ் பண்டிகை சிறப்பு கூட்டு பாடல் திருப்பலியில் திரளான பக்தர்கள் பங்கேற்றனர்.

கீழ்திசை நாடுகளின் லூர்து என்றழைக்கப்படும், நாகை அடுத்த வேளாங்கண்ணி, ஆரோக்கிய மாதா தேவாலயத்தில், கிறிஸ்துமஸ் பண்டிகையை முன்னிட்டு, தேவாலயம் அருகே சேவியர் திடலில்,சிறப்பு கூட்டு பாடல் திருப்பலி நடைபெற்றது. நேற்று இரவு 11 30 மணிக்கு துவங்கிய சிறப்பு பாடல் திருப்பலி இன்று அதிகாலை 1 30 மணி வரை நடந்தது. தேவாலய அதிபர் இருதயராஜ், பங்கு பாதிரியார் அற்புதராஜ் தலைமையில், 25 க்கும் மேற்பட்ட பாதிரியார்கள் பங்கேற்ற சிறப்பு பாடல் திருப்பலியில், இயேசு கிறிஸ்துவின் பிறப்பு அறிவிப்பு, நற்கருணை ஆசீர், மக்களின் அமைதிக்கான சிறப்பு ஜெபம் ஆகியவை தமிழ், தெலுங்கு, மலையாளம் , ஹிந்தி, ஆங்கிலம் ஆகிய மொழிகளில் நடந்தது.நாட்டின் பல்வேறு பகுதிகளில் இருந்து வந்திருந்த ஆயிரக்கணக்கான பக்தர்கள், நள்ளிரவை நல்லிரவாக்கிய சிறப்பு கூட்டுப்பாடல் திருப்பலியில் கலந்து கொண்டனர்.