நயினார்கோவில்: பரமக்குடி அருகே நயினார்கோவில் ஒன்றியம் கொழுவூரில் கருணைபுரி கைலாசநாதர் சிவனடியார் திருக் கூட்டத்தின் சார்பில் திருவாசக முற்றோதல் நிகழ்ச்சி நடந்தது.

நயினார்கோவில் கொழுவூரில் ஆதி நாகநாதர் அருள்பாலிக்கிறார். இக்கோயிலில் சிவலிங்கம் மணல்மேட்டிலேயே இருந்தபடி மூலவராக வீற்றிருக்கிறார். மேலும் லிங்கம் வீற்றிருக்கும் புற்றடி மண்ணை எடுத்து பிரசாதமாக பக்தர்களுக்கு வழங்கப்படுகிறது. இச்சிறப்பு வாய்ந்த கோயிலில் பன்னிரு திருமுறை நூலை கயிலை வாத்தியம் முழங்க கொண்டு சென்றனர். பின்னர் காலை 10:00 மணி தொடங்கி, மாலை 5:00 மணி வரை திருவாசக முற்றோதல் நிகழ்த்தப்பட்டது. முன்னதாக காலையில் சிறப்பு அபிஷேக, ஆராதனைகளும், மதியம் அன்னதானம் வழங்கப்பட்டது. கொழுவூர் கிராம மக்கள், கருணைபுரை கைலாசநாதர் சிவனடியார் திருக்கூட்டத்தினர் ஏற்பாடுகளை செய்திருந்தனர்.