அன்னூர்: மொண்டிபாளையம், வெங்கடேச பெருமாள் கோவில் தேர்த்திருவிழா கொடியேற்றத்துடன் துவங்கியது.

கோவை மாவட்டம், அன்னூர் அடுத்து மொண்டிபாளையம், வெங்கடேச பெருமாள் கோவில், மேலத்திருப்பதி என்று அழைக்கப்படுகிறது. பிரசித்தி பெற்ற இக்கோவிலில் ஒவ்வொரு ஆண்டும் புரட்டாசி திருவிழாவில் பல லட்சம் பேர் பங்கேற்பர். இக்கோவில் தேர்த் திருவிழாவில் நேற்று இரவு நகர சோதனை மற்றும் வாஸ்து சாந்தி நடந்தது. நேற்று காலை பெருமாள் உள்ளிட்ட உற்சவர்களுக்கு காப்பு கட்டும் நிகழ்ச்சி நடந்தது. இதையடுத்து கருடாழ்வாருக்கு திருமஞ்சனம் நடந்தது. காலை 8:15 மணிக்கு கொடியேற்றம் நடந்தது. கோவிந்தா, கோவிந்தா என பக்தர்கள் பக்தி கரகோஷம் எழுப்பினர். இதையடுத்து வெங்கடேச பெருமாளுக்கு மகா தீபாராதனை நடந்தது. செயல் அலுவலர், பரம்பரை அறங்காவலர்கள் உள்பட சுற்று வட்டாரத்தைச் சேர்ந்த திரளான பக்தர்கள் பங்கேற்றனர். வரும் 31ம் தேதி வரை தினமும் இரவு வெவ்வேறு வாகனங்களில் பெருமாள் திருவீதி உலா நடக்கிறது. பிப். 1ம் தேதி காலை 10:00 மணிக்கு, அம்மன் அழைத்தலும், திருக்கல்யாண உற்சவமும் நடக்கிறது. 2ம் தேதி இரவு யானை வாகனத்தில் பெருமாள் திருவீதி உலா நடக்கிறது. வரும் 3ம் தேதி காலை 5:30 மணிக்கு வெங்கடேச பெருமாள் ஸ்ரீதேவி பூதேவி சமேதராக தேருக்கு எழுந்தருளுகிறார். காலை 11:00 மணிக்கு தேரோட்டம் நடக்கிறது.