சபரிமலை, சபரிமலையில் பங்குனி உத்திர திருவிழாவில் இன்று சரங்குத்தியில் இன்று பள்ளிவேட்டையும், பம்பையில் நாளை ஆராட்டும் நடக்கிறது. சபரிமலையில் பங்குனி உத்திர திருவிழா கடந்த 27–ம் தேதி காலை கொடியேற்றத்துடன் தொடங்கி வருகிறது. அதை தொடர்ந்து தினமும் வழக்கமான பூஜைகளுடன் மதியம் உற்சவ பலியும், இரவில் யானை மீது சுவாமி எழுந்தருளும் நிகழ்ச்சியும் நடைபெற்று வருகிறது. இன்று இரவு அத்தாழ பூஜைக்கு பின்னர் சுவாமி சரங்குத்திக்கு பள்ளி வேட்டைக்கு எழுந்தருளுவார். நள்ளிரவில் கோயில் திரும்பியதும் கோயில் முன்புறம் உள்ள மண்டபத்தில் பள்ளிஉறக்கம் நடைபெறும். இன்று அதிகாலை 5:00 மணிக்கு நடை திறந்ததும் சுவாமி ஸ்ரீகோயிலுக்குள் எழுந்தருளும் நிகழ்ச்சி நடக்கிறது. காலை 7:00 மணிக்கு உஷபூஜை முடிந்ததும் யானை மீது சுவாமி பவனி ஆராட்டுக்காக பம்பபைக்கு புறப்படும். பகல் 12.30 மணிக்கு பம்பையில் ஆராட்டு முடிந்த பின்னர் மாலை 4:00 மணிக்கு சன்னிதானத்துக்கு பவனி புறப்பட்டு செல்லும். இரவில் சன்னிதானம் வந்ததும் திருக்கொடி இறக்கப்பட்டு விழா நிறைவு பெறும். இரவு 10:00 மணிக்கு நடை அடைக்கப்படும்.