சிங்கம்புணரி; சிங்கம்புணரி சேவுகப்பெருமாள் அய்யனார் கோயில் கும்பாபிஷேகத்தை ஒட்டி யாகசாலை பூஜைகள் தொடங்கியது. சிவகங்கை தேவஸ்தானத்துக்கு உட்பட்ட இக்கோயில் கும்பாபிஷேகம் வருகின்ற ஜூன் 1ம் தேதி நடக்கிறது. இதையொட்டி யாகசாலை பூஜைகள் தொடங்கியது. அதிகாலை 5:00 மணிக்கு கோயில் மண்டபத்தில் அனுச்ஜை, விக்னேஸ்வர பூஜை, கணபதி ஹோமத்துடன் பூஜைகள் தொடங்கியது. திருப்பணிக்குழு தலைவர் ராம.அருணகிரி தலைமை வகித்தார். கோயில் சூப்பிரண்டு தண்ணாயிரம் முன்னிலை வகித்தார். பரம்பரை ஸ்தானிகம் சிவாச்சாரியார்கள் யாக பூஜைகளை நடத்தி வைத்தனர். இதைத் தொடர்ந்து புனித கலசங்கள் கோயில் உள்பிரகாரத்தை சுற்றி எடுத்துவரப்பட்டு நவக்கிரகங்களுக்கு சிறப்பு வழிபாடு நடத்தப்பட்டது. தொடர்ந்து ரக்ஷாகின ஹோமம், பிரவேச பலி நடந்தது. மாலை 5:30 மணிக்கு மங்கல இசையுடன் திருமறை, வாஸ்து சாந்தி பூஜைகள் செய்யப்பட்டது. பிரவேச பலி மற்றும் திசா ஹோமம் சம்ஹிதா ஹோமம் செய்யப்பட்டது. கிராம முக்கிய பிரமுகர்கள் உள்ளிட்ட ஏராளமான பக்தர்கள் பங்கேற்றனர்.