சென்னை: சென்னை சூப்பர் கிங்ஸ் அணி வென்ற ஐபிஎல் கோப்பைக்கு தி.நகர், திருமலை திருப்பதி தேவஸ்தான கோவிலில் சிறப்பு பூஜை செய்யப்பட்டது.

ஐபிஎல் டி 20 கிரிக்கெட் தொடரின் 16-வது சீசனில் தோனி தலைமையிலான சிஎஸ்கே அணி சாம்பியன் பட்டம் வென்றது. ஐபிஎல் டி-20 கிரிக்கெட் தொடரின் இறுதிப் போட்டி குஜராத் மாநிலம் அகமதாபாத்தில் நேற்று முன்தினம் நடைபெற்றது. இதில், குஜராத் டைட்டன்ஸ் அணியை வீழ்த்தி சென்னை சூப்பர் கிங்ஸ் (CSK) அணி 5வது முறையாக சாம்பியன் பட்டத்தை வென்றது. இந்நிலையில், சிஎஸ்கே அணி வென்ற ஐபிஎல் கோப்பை, அகமதாபாத்தில் இருந்து விமானம் மூலம் நேற்று சென்னைக்கு கொண்டு வரப்பட்டது. விமான நிலையத்தில் இருந்து சென்னை தி நகரில் உள்ள திருமலை திருப்பதி தேவஸ்தானம் கோயிலுக்கு கோப்பை கொண்டு வரப்பட்டு, திருப்பதி தேவஸ்தானத்தில் கோப்பைக்கு சிறப்பு பூஜை செய்யப்பட்டது. இதில் சிஎஸ்கே சேர்மன் ஆர்.சீனிவாசன், தலைமை செயல் அதிகாரி காசி விஸ்வநாதன் மற்றும் ஏராளமானோர் கலந்து கொண்டனர்.