சபரிமலை; ஐதராபாத்தில் இருந்து பக்தர்கள் குழுவினருடன் வந்த பைரவன் என்ற நாய் சபரிமலை சன்னிதானத்தில் பக்தர்களின் கவனத்தை ஈர்த்தது.

ஐதராபாத்தில் இருந்து குருசாமி ராஜசேகர் தலைமையில் 130 பக்தர்கள் அடங்கிய ஒரு குழுவினர் கால்நடையாக சபரிமலைக்கு புறப்பட்டனர். இவர்கள் தமிழ்நாட்டில் சேலத்துக்கு வந்த போது ஒரு நாய் இந்த பக்தர்கள் குழுவுடன் சேர்ந்தது. அவர்களை விட்டு பிரியாமல் இருந்த அந்த நாய்க்கு பக்தர்கள் உணவு கொடுத்தனர். சேலம் அண்டி பேட் கோட்டை செக்போஸ்டில் இருந்து இந்த நாய் பக்தர்களுடன் தனது பயணத்தை தொடங்கியது. பக்தர்களுடன் தொடர்ந்து நடந்து வந்த நாய் அந்தக் குழுவில் ஒரு அங்கமாக மாறிவிட்டது. இதைத்தொடர்ந்து அதற்கு பைரவன் என்று பெயர் வைத்து பக்தர்கள் கூடவே அழைத்து வந்தனர். வள்ளகடவு, புல்மேடு வழியாக சபரிமலை சன்னிதானம் பாண்டித்தாளத்தில் உள்ள மாகுண்டா நிலையத்துக்கு பக்தர்கள் வந்த போது அங்கும் நாய் பைரவன் கூடவே இருந்தது. பைரவனை ஹைதராபாத்துக்கு அழைத்துச் செல்ல இருப்பதாக அந்த குழுவை சேர்ந்த பக்தர் நரேஷ் தெரிவித்தார். பக்தர்களுடன் கால்நடையாக வந்த நாய் பக்தர்களை கவர்ந்தது.