அன்னூர்; அன்னூர் பெருமாள் கோவில் கும்பாபிஷேக விழா நேற்று துவங்கியது. நாளை (14 ம் தேதி) கும்பாபிஷேகம் நடைபெறுகிறது.

அன்னூரில் 400 ஆண்டுகள் பழமையான கரி வரதராஜ பெருமாள் கோவில் உள்ளது, இக்கோவிலில், 14 ஆண்டுகளுக்குப் பிறகு புதிதாக மகா மண்டபம், 12 ஆழ்வார்கள் சன்னதி, ஆகியவை அமைக்கப்பட்டு திருப்பணிகள் செய்யப்பட்டன. இதையடுத்து கும்பாபிஷேக விழா நேற்று துவங்கியது. பவானி கூடுதுறையில் இருந்து தீர்த்த குடங்கள் கொண்டுவரப்பட்டு நேற்று வழிபாடு செய்யப்பட்டது. நேற்று காலை 8:30 மணிக்கு விஸ்வக் சேனா பூஜை உடன் கும்பாபிஷேக விழா துவங்கியது. பஞ்சகவ்ய பூஜை, சுதர்சன ஹோமம் நடந்தது. மாலையில் சங்கல்பம் செய்தலும், புண்ணியாக வாசமும், ரக்ஷாபந்தனமும் கலசங்கள் நிறுவுதலும் நடந்தது. இன்று காலை 8:30 மணிக்கு கால சந்தி பூஜை, அக்னி பாராயணம் நடக்கிறது. மாலை 4:30 மணிக்கு மகா சாந்தி ஹோமம், கலச சாந்தி பூஜை பிரதான ஹோமம் நடக்கிறது. வருகிற 14ம் தேதி அதிகாலையில் நவகிரக ஹோமம் நடக்கிறது. காலை 7:30 மணிக்கு மூலவர், பரிவார தெய்வங்கள், விமானம் ஆகியவற்றிற்கு புனித நீர் ஊற்றி கும்பாபிஷேகம் செய்யப்படுகிறது. விழாவில் பேரூர் ஆதீனம் சாந்தலிங்க மருதாசல அடிகள், சிரவை ஆதீனம் குமரகுருபர சுவாமிகள் ஆகியோர் அருளுரை வழங்குகின்றனர், அன்னதானம் வழங்கப்படுகிறது. விழா ஏற்பாடுகளை திருப்பணிக் கமிட்டியினர் செய்து வருகின்றனர்.