திருப்புத்தூர்; திருப்புத்தூர் நகரின் காவல்தெய்வமான கோட்டைக்கருப்பண்ண சுவாமி கோயிலில் 17 ஆ்ண்டுகளுக்கு பின்னர் நடந்த கும்பாபிஷேகத்தை பக்தர்கள் திரளாகக் கூடி தரிசித்தனர்.

திருப்புத்தூர் நகரின்  பல நாற்றாண்டு புராதன கோட்டையின் கிழக்கு திசையில் பிரதான வாசலில் அமைந்துள்ளது கோட்டைக்கருப்பர் கோயில். இங்கு சேமக்குதிரைகள், உறங்காப்புளி மரம் இவற்றுடன்  விநாயகர், பாலமுருகன், கோட்டைக்கருப்பர், சங்கிலிக்கருப்பர், காளியம்மன்,ராக்காச்சி அம்மன்,பேச்சிஅம்மன், பரிவார தெய்வங்கள் அடங்கிய சன்னதிகள் உள்ளன. இக்கோயிலுக்கு 2007 ல் கும்பாபிஷேகம் நடந்தது. தற்போது 17 ஆண்டுகளுக்குப் பின்னர் திருப்பணிகள் நடந்தது.  கும்பாபிஷேகத்தை முன்னிட்டு யாகசாலை பூஜைகள் பிப். 18 ல் துவங்கியது. பெ.நமசிவாய சிவாச்சாரியார் தலைமையில் சிவாச்சார்யர்களால் மூன்று நாட்களில் ஐந்து கால யாகசாலை பூஜைகள் நடத்தப்பட்டது. யாகசாலை பூஜையில் அமைச்சர் பெரியகருப்பன் பங்கேற்றார். இன்று காலை 6:00 மணிக்கு ஆறாம் கால யாகசாலை பூஜை துவங்கி 9:30 மணிக்கு பூர்ணாகுதி தீபாராதனை நடைபெற்றது.

தொடர்ந்து சிவாச்சார்யர்களால் கலசங்கள் புறப்பாடாகி  மூலவர் மற்றும் பரிவார தெய்வங்களின் 7 விமான கலசங்களை அடைந்தது. தொடர்ந்து மந்திரங்கள் முழங்க, மங்கள வாத்தியங்கள் ஒலிக்க விமானங்களுக்கு காலை 9:50 மணிக்கு  யாகசாலை புனிதநீரால் கும்பாபிஷேகம் நடந்தது. குன்றக்குடி பொன்னம்பல அடிகள் முன்னிலை வகித்தார். கும்பாபிஷேக புனித நீர் பக்தர்களுக்கு ட்ரோன் மூலம் தெளிக்கப்பட்டது. பின்னர் விமான கலசங்களுக்கு தீபாராதனை நடந்தது.  தொடர்ந்து, மூலவர் கோட்டைக்கருப்பர், சங்கிலிக்கருப்பர்,காளியம்மன், ராக்காச்சியம்மன், பேச்சியம்மன், விநாயகர், பாலமுருகன் ஆகியோருக்கு மகா அபிஷேகம் நடந்தது.  நாட்டார், நகரத்தார்,திருப்புத்தூர் கிராமத்தினர்,குலதெய்வ வழிபடும் ஊரார், பரம்பரை பூசகர்கள் பங்கேற்றனர். கோயில் சார்ந்த கிராமங்களிலிருந்து பட்டு மரியாதையுடன் ஊர்வலமாக சாமியாடிகளுடன் வந்து பங்கேற்றனர். கோயிலைச்சுற்றிலும் பக்தர்கள் திரளாகக் கூடி கும்பாபிஷேகத்தை தரிசித்தனர். ஏற்பாட்டினை அறங்காவலர் எஸ்.வயிரவன் தலைமையில் துணைத் தலைவர்கள்  சித.வயி.லெட்சுமணன், அழ.சி.ராமசுவாமி, செயலாளர் மா.அண்ணாத்துரை, துணைச் செயலாளர்கள் பழ.சிவப்பிரகாசம், வெளியாரி மு.காசிநாதன், பொருளாளர் மீ.மீனாட்சி சுந்தரம் உள்ளிட்ட திருப்பணிக்குழுவினர் செய்தனர்.  யாகசாலை துவங்கிய முதல் அன்னதானம் நடந்தது. கலை நிகழ்ச்சி, பட்டிமன்றம், கருப்பர் புகழ் பாடல் வெளியீடு நடந்தது.