பழநி; பழநி பெரியநாயகியம்மன் கோயிலில் வைகாசி விசாக திருவிழா கொடியேற்றத்துடன் துவங்கியது.

பழநி முருகன் கோயில் நிர்வாகத்திற்கு கட்டுப்பட்ட பெரியநாயகியம்மன் கோயிலில் இன்று (மே.16) வைகாசி விசாக திருவிழா, கொடியேற்றம் காலை 9:25 மணிக்கு நடைபெற்றது. சூரியன், சந்திரன், மயில், சேவல், வேல் வரையப்பட்ட மஞ்சள் நிற கொடியை கோயில் முன்பிருந்த கொடிக்கம்பத்தில் ஏற்றினர். பக்தர்கள் "வெற்றிவேல் முருகனுக்கு அரோகரா" என கோஷமிட்டனர். கொடியேற்றத்தில் கோயில் துணை கமிஷனர் வெங்கடேஷ், கண்காணிப்பாளர் அழகர்சாமி மற்றும் பக்தர்கள் பலர் கலந்து கொண்டனர். விழா நாட்களில் சப்பரத்தில் சுவாமி புறப்பாடு நடைபெறும். தங்க பல்லாக்கு, தங்க மயில், காமதேனு ஆட்டுக்கடா,வெள்ளி யானை, வெள்ளி மயில், தங்கக்குதிரை வாகனங்களில் விழா நாட்களில் சுவாமி புறப்பாடு நடைபெற உள்ளது. ஆறாம் நாள் திருவிழாவில் (மே 21) மாலை 6:00 மணிக்கு மேல் 6:30 மணிக்குள் வள்ளி, தெய்வானை, முத்துக்குமாரசாமி திருக்கல்யாணம் நடைபெறும். வைகாசி விசாகத்தன்று மே 22,ல் திருதேரேற்றம் நடைபெறும், மாலை 4:30 மணிக்குமேல் திருத்தேரோட்டம் நடைபெற உள்ளது. பத்தாம் நாள் மே 25 இரவு கொடி இறக்குதல் நடைபெற்று உற்சவம் நிறைவு பெற உள்ளது.