சபரிமலை; ஆனி மாத பூஜை களுக்காக சபரிமலை நடை நேற்று மாலை திறந்தது. வரும் 19 வரை பூஜைகள் நடைபெறும். நேற்று மாலை 5:00 மணிக்கு மேல் சாந்தி மகேஷ் நம்பூதிரி ஸ்ரீ கோயில் நடை திறந்து தீபம் ஏற்றினார். அதை தொடர்ந்து பக்தர்கள் 18 படிகள் வழியாக தரிசனத்துக்கு அனுமதிக்கப்பட்டனர். நேற்று வேறு பூஜைகள் எதுவும் நடைபெறவில்லை. இரவு 10:00 மணிக்கு நடை அடைக்கப்பட்டது. இன்று அதிகாலை 5:00 மணிக்கு நடை திறந்ததும் தந்திரி மகேஷ் மோகனரரு ஐயப்பன் விக்ரகத்தில் அபிஷேகம் நடத்தி நெய் அபிஷேகத்தை தொடங்கி வைத்தார். தொடர்ந்து கணபதி ஹோமம், உஷ பூஜை, மதியம் கலசாபிசேகம், களபாபிஷேகம், உச்ச பூஜை நடைபெற்றது. மாலை தீபாராதனைக்கு பின்னர் இரவு 7:00 மணிக்கு படி பூஜை நடைபெறும். இரவு 9:00 மணிக்கு அத்தாழ பூஜை முடிந்து 10.00 மணிக்கு நடை அடைக்கப்படும். 19 வரை இதுபோல பூஜைகள் நடைபெற்று அன்று இரவு 10:00 மணிக்கு நடை அடைக்கப்படும். ஆன்லைன் முன்பதிவு மூலம் பக்தர்கள் தரிசனத்துக்கு அனுமதிக்கப்பட்டுள்ளனர்.