பரமக்குடி; பரமக்குடி சுந்தரராஜ பெருமாள் கோயில் ஆடி பிரம்மோற்ஸவ விழாவில் பூ பல்லகில் ஸ்ரீதேவி, பூதேவி தாயாருடன் பெருமாள் வீதி உலா வந்தார்.

பரமக்குடி சுந்தரராஜ பெருமாள் தேவஸ்தானத்தைச் சேர்ந்த கோயிலில் ஆடி பிரம்மோற்சவ விழா நடக்கிறது. இக்கோயிலில் தினமும் பெருமாள் பல்வேறு அலங்காரங்களில் வரும் நிலையில், நேற்று முன்தினம் இரவு ஆண்டாள், பெருமாள் மாலை மாற்றல் நிகழ்ச்சி நடந்தது. நேற்று மாலை 6:00 மணிக்கு சுந்தரராஜ பெருமாள் அமர்ந்த திருக்கோலத்தில் எழுந்தருளினார். தொடர்ந்து இரவு 8:00 மணிக்கு வெற்றிவேர் மற்றும் பல வண்ண மலர்களால் அலங்கரிக்கப்பட்ட பூ பல்லக்கில் அமர்ந்தார். பின்னர் பரமக்குடியின் முக்கிய வீதிகளில் உலா வந்த பெருமாளுக்கு பக்தர்கள் தேங்காய் உடைத்து பிரசாதங்கள் வழங்கி தரிசனம் செய்தனர். இன்று காலை வெண்ணெய் தாழி ஏந்தி தவழும் கண்ணனாகவும், இரவு குதிரை வாகனத்தில் கள்ளழகர் திருக்கோலத்தில் வைகை ஆறு மண்டகப்பாடியில் அருள் பாலிக்க உள்ளார்.