சிவகங்கை, பாகனேரி கருணாகடாட்சி சமேத நீலகண்டேஸ்வரர், தாயார் ஆண்டாள் சமேத விண்ணவண்ண பெருமாள் கோயில் கும்பாபிஷேகம் நடந்தது.

சிவகங்கை தேவஸ்தானத்திற்கு உட்பட்ட இக்கோயிலில் அனுக்கை, விக்னேஸ்வர பூஜையுடன் கும்பாபிஷேக பூஜைகள் தொடங்கின. ஆறு கால யாகசாலை பூஜைகள் நடந்தது. நேற்று காலை 6:45 மணிக்கு நீலகண்டேஸ்வரர் கோயில் கோபுர கலசத்தில் பிள்ளையார்பட்டி பிச்சை குருக்கள், பாகனேரி முத்துவடுகநாத குருக்கள் ஆகியோர் தலைமையில் சிவாச்சாரியார்கள் கோபுர கலசத்தில் புனித நீர் ஊற்றி கும்பாபிஷேகத்தை நடத்தி வைத்தனர். ஏராளமான பக்தர்கள் கும்பாபிஷேகத்தை கண்டு ரசித்தனர். மாலை 4:15 மணிக்கு மகா அபிஷேகம் நடந்தது. மாலை 6:15 மணிக்கு திருக்கல்யாண உற்சவம், சுவாமி புறப்பாடு நடந்தது. *

 பாகனேரி பூமிநீளா சமேத விண்ணவண்ண பெருமாள் கோயிலில் காலை 5:30 மணிக்கு புன்யாகவாசனம், கும்ப பூஜையுடன் கும்பாபிஷேக விழா தொடங்கியது. அர்ச்சகர்கள் புனித நீர் கடப்புறப்பாடு நடந்தது. காலை 7:45 மணி முதல் 8:45 மணிக்குள் கோபுர கலசங்களில் புனித நீர் ஊற்றி கும்பாபிஷேகத்தை நடத்தினர். மாலை 6:30 மணிக்கு பெருமாள் திருவீதி உலா நடைபெற்றது. ஏராளமான பக்தர்கள் கும்பாபிேஷகத்தில் பங்கேற்றனர். தேவஸ்தான மேலாளர் இளங்கோ, கண்காணிப்பாளர் வேல்முருகன் மற்றும் பாகனேரி நகரத்தார்கள் விழா ஏற்பாட்டை செய்திருந்தனர்.