ராமேஸ்வரம்; ராமேஸ்வரத்தில் வெயில் சுட்டெரிப்பதால் பர்வதம் ராமர் கோயிலுக்கு செல்லும் பக்தர்கள் பெரிதும் அவதிப்படுகின்றனர்.

ராமாயண வரலாற்றில், அனுமான், வானர சேனைகள் தனுஷ்கோடியில் இருந்து இலங்கைக்கு பாலம் அமைத்த போது, ஸ்ரீ ராமர் கெந்தமாதன பர்வதம் (உயரமான மணல் திட்டு) எனுமிடத்தில் நின்றபடி கட்டுமான பணியை பார்வையிட்டதாக கூறப்படுகிறது. இதன் நினைவாக இங்கு ராமரின் பாதம் பொருத்திய கோயில் உள்ளதால், ராமர் பாதம் கோயில் என பெயரிடப்பட்டு உள்ளது. ராமேஸ்வரம் ராமநாதசுவாமி கோயில் நிர்வாகம் கட்டுப்பாட்டில் உள்ள இக்கோயிலுக்கு தினமும் ஏராளமான பக்தர்கள் சுவாமி தரிசனம் செய்கின்றனர். ஆனால் தற்போது ராமேஸ்வரத்தில் வெயில் சுட்டெரிப்பதால் ராமர் பாதம் கோயிலுக்கு செல்லும் பக்தர்கள் 150 அடி உயரத்தில் படிக்கட்டுகளில் நடக்க வேண்டி உள்ளது. இதனால் வயது மூத்த பக்தர்கள், பெண்கள், குழந்தைகள் வெப்ப சலனத்தில் நடக்க முடியாமல் அவதிப்படுகின்றனர். எனவே படிக்கட்டு பாதையில் நிழல் தரும் பந்தல் அமைக்க கோயில் நிர்வாகம் நடவடிக்கை எடுக்க வேண்டும் என பக்தர்கள் கோரிக்கை விடுத்தனர்.