திருப்பரங்குன்றம்; திருப்பரங்குன்றம் சுப்பிரமணிய சுவாமி கோயிலில் நேற்று மாலை கந்த சஷ்டி சூரசம்ஹார லீலையை தொடர்ந்து, இன்று காலை தேரோட்டம் நடைபெற்றது. 

கோயிலில் நவ. 3 முதல் நடைபெற்ற யாகசாலை பூஜை நேற்று காலை பூர்த்தி செய்யப்பட்டு தங்கம் மற்றும் வெள்ளி குடங்களிலிருந்த புனித நீர் சண்முகர், வள்ளி, தெய்வானைக்கு அபிஷேகம் செய்யப்பட்டது. உச்சி கால பூஜை முடிந்து உற்ஸவர் சுப்பிரமணிய சுவாமி சம்ஹார அலங்காரத்தில் தங்கமயில் வாகனத்திலும், வீரபாகுதேவர் வெள்ளை குதிரை வாகனத்திலும் எழுந்தருளி வீதி உலா நிகழ்ச்சி நடந்தது. யானைமுகம், சிங்கமுகம், ஆட்டுத்தலை உள்பட பல்வேறு உருவங்களில் சூரபத்மன் மாறி மாறி செல்ல இறுதியில் சுப்பிரமணிய சுவாமி சூரனை விரட்டி சென்று சம்ஹாரம் செய்யும் நிகழ்ச்சி நடந்தது.  உற்ஸவர் சன்னதியில் சுப்பிரமணிய சுவாமி, தெய்வானை மாலை மாற்றி, தீபாராதனை முடிந்து பூ சப்பரத்தில் வீதி உலா நிகழ்ச்சி நடந்தது. திருவிழாவின் உச்ச நிகழ்ச்சியாக இன்று காலை சட்டத்தேரில் சுப்பிரமணிய சுவாமி, தெய்வானை எழுந்தருளி கிரி வீதி, ரத வீதிகளில் தேரோட்டம் கோலாகலமாக நடைபெற்றது. ஏராளமான பக்தர்கள் வடம் பிடித்தனர்.