பழநி; பழநி கோயிலில் கந்தசஷ்டி விழாவில் திருக்கல்யாணம் உற்ஸவம் நடைபெற்றது.

பழநி கோயிலில் காப்பு கட்டுதலுடன் கந்த சஷ்டி விழா நவ.2., துவங்கியது. கந்த சஷ்டி திருவிழாவில் நவ.7., கோவிலில் மலைக்கொழுந்து அம்மனிடம் வேல்வாங்குதல் நடைபெற்று, பராசக்தி வேல் மலையிலிருந்து இறங்கி கிரி வீதியில் சூரசம்ஹாரம் நடைபெற்றது. வெற்றி விழாவிற்கு பின் கோயிலில் இரவு சம்ரோட்சன பூஜைக்கு பின் அர்த்தஜாம பூஜை நடைபெற்றது. இன்று (நவ.9.,ல்) கோயிலில் அமிர்தலிங்கம்குருக்கள், செல்வசுப்ரமணியம்குருக்கள் குழுவினர் யாகத்தில் வைக்கப்பட்ட கலசங்களில் உள்ள புனித நீரில் சண்முகர், வள்ளி, தெய்வானைக்கு அபிஷேகம் நடைபெற்றது. மங்கள வாத்தியங்கள் முழங்க காலை 10:00 மணிக்கு சண்முகர்,வள்ளி, தேய்வானைக்கு மாங்கல்யதாரணம், செய்து திருக்கல்யாணம் நடந்தது. திருக்கல்யாண உற்ஸவம், திரளாக கலந்து கொண்ட பக்தர்களின் அரோகரா கோஷத்துடன் நடை பெற்றது. தொடர்ந்து, மாலை மாற்றுதல், திருமணகோலத்தில் சண்முகர், வள்ளி, தெய்வானைக்கு சிறப்பு தீபாராதனை நடைபெற்றது. திருக்கல்யாணத்திற்கு பின் சிறப்பு அன்னதானம் நடைபெற்றது. பக்தர்கள் மூன்று மணி நேரத்திற்கு மேலாக காத்திருந்து சுவாமி தரிசனம் செய்தனர். மாலை பெரியநாயகி அம்மன் கோவிலில் வள்ளி, தேய்வானை உடன் முத்துக்குமாரசுவாமிக்கும் திருக்கல்யாணம் நடைபெற்றது. நிகழ்ச்சியில் கோயில் இணை கமிஷனர் மாரிமுத்து, அதிகாரிகள் கன்பத் கிராண்ட் ஹரிஹர முத்து அய்யர், நகரின் முக்கிய பிரமுகர்கள் பலர் கலந்து கொண்டனர். அடிவாரம் போலீசார் அன்னதானம் வழங்கினர்.