திருவண்ணாமலை; திருவண்ணாமலையில், ஏராளமான பக்தர்கள் குபேர கிரிவலம் சென்று, குபேர லிங்கத்தை தரிசனம் செய்து வழிபட்டனர். 

திருவண்ணாமலையில் பவுர்ணமி, கார்த்திகை தீபம் போன்ற விசேஷ நாட்களில் கிரிவலம் சென்று லட்சக்கணக்கான பக்தர்கள் அருணாசலேஸ்வரரை வழிபடுகின்றனர். இதில்,  கார்த்திகை மாதம், தேய்பிறை  சிவராத்திரி நாளில் குபேர பெருமான், திருவண்ணாமலையில் கிரிவலம் செல்வதாக பக்தர்களின் நம்பிக்கையாக உள்ளது. அன்று கிரிவலம் சென்றால், குபேர பெருமான் ஆசி கிடைத்து, செல்வம் பெருகும் என்பது பக்தர்களின் நம்பிக்கையாக உள்ளது. அதன்படி சிவராத்திரி நாளான  நேற்று மாலை,  பக்தர்கள் கிரிவலப்பாதையில் ஏழாவதாக உள்ள குபேர லிங்கத்திற்கு மாலை, 4:30 முதல்,  6:00 மணி வரை சிறப்பு அபிஷேகம், பூஜை செய்து வழிபட்டு கிரிவலம் சென்றனர்.  மேலும், கிரிவலப்பாதை முழுவதும் தீபம் ஏற்றியும், பெண்கள் வீடுகளுக்கு முன்பு தீபம் ஏற்றியும் வழிபட்டனர்.