மானாமதுரை; மானாமதுரையில் உள்ள உச்சமாகாளியம்மன் கோயிலில் வருகிற டிசம்பர் 15ம் தேதி கும்பாபிஷேக விழா நடைபெற உள்ளது.

மானாமதுரை மெயின் பஜார் வளைவில் உள்ள உச்ச மாகாளியம்மன் கோயிலில் கும்பாபிஷேகத்திற்காக கடந்த சில மாதங்களாக மராமத்து பணிகள் மற்றும் திருப்பணிகள் நடைபெற்று வந்தன. பணிகள் முடிவு பெற்றதை தொடர்ந்து கும்பாபிஷேக விழாவிற்காக கோயில் அருகே யாகசாலைகள் அமைக்கப்பட்டு வருகிற 14ம் தேதி கணபதி ஹோமத்துடன், காலை 8:30 மணிக்கு முதலாம் கால யாக சாலை பூஜைகள் ஆரம்பிக்கப்பட்டு தொடர்ந்து பூஜைகள் நடத்தப்பட்டு, 15ம் தேதி காலை 9:00 மணிக்கு கடம் புறப்பாடாகி 9:30 மணிக்கு விமான கும்பாபிஷேகமும், 10:00 மணிக்கு மூலவர் உச்சமாகாளியம்மனுக்கு கும்பாபிஷேகமும் நடைபெற உள்ளது. தொடர்ந்து அபிஷேக, ஆராதனைகளும், தீபாராதனைகளும் நடைபெற உள்ளன. பின்னர் அன்னதானம் வழங்கப்பட உள்ளது. கும்பாபிஷேக விழாவிற்கான ஏற்பாடுகளை பரம்பரை பூஜாரிகள் ராமகிருஷ்ணன், கதிரேசன், உச்சமாகாளியம்மன் அறக்கட்டளை நிர்வாகிகள் மற்றும் மானாமதுரை நகர பொதுமக்கள் செய்து வருகின்றனர்.