திருவள்ளூர்: திருவள்ளூர் வீர ராகவர் பெருமாள் கோவிலில், தை பிரம்மோற்சவ விழாவை ஒட்டி, இன்று கருட சேவை நடைபெறுகிறது. திருவள்ளூர் வீர ராகவ பெருமாள் கோவிலில், தை பிரம்மோற்சவ விழா, நேற்று முன்தினம் கொடி ஏற்றத்துடன் துவங்கியது. காலை, 7:00 மணிக்கு தங்க சப்பரத்திலும், இரவு, 7:00 மணிக்கு சிம்ம வாகனத்திலும் நேற்று காலை, 7:30 மணிக்கு அம்ச வாகனத்திலும், இரவு, 7:00 மணிக்கு சூரிய பிரபையிலும் உற்சவர் வீதி உலா நடைபெற்றது. நிகழ்ச்சியின் முக்கிய நாளான இன்று, காலை, 5:00 மணிக்கு கருட சேவை (கோபுர தரிசனம்), வீதி புறப்பாடு, காலை, 7:00 மணிக்கும் நடைபெறும். இன்று இரவு, 8:00 மணிக்கு அனுமந்த வாகனத்தில் பெருமாள் காட்சி அளிப்பார். பிரம்மோற்சவத்தின், 7வது நாளான ஜன.,14ம் தேதி, தேரோட்டம் நடைபெறும். 10வது நாளான ஜன.,17ம் தேதி, வெட்டிவேர் சப்பரத்தில் இரவு, 8:00 மணிக்கு பெருமாள் புறப்பாடுடன் பிரம்மோற்சவ விழா நடைபெறுகிறது.