விஜயவாடா, ஆந்திரப் பிரதேச மாநிலம் விஜயவாடாவில் உள்ள புகழ்பெற்ற கனக துர்கா அம்மன் கோயிலில் தசரா விழாவின் ஐந்தாம் நாளான நேற்று வியாழக்கிழமை, ஸ்ரீ லலிதா திரிபுரசுந்தரி அலங்காரத்தில் அம்மன் எழுந்தருளி பக்தர்களுக்கு அருள்பாலித்தார். அம்மனைத் தரிசிக்க இந்திரகீலாத்ரி மலைக்கோயிலில் சுமார் ஒரு லட்சம் பக்தர்கள் குவிந்தனர்.

ஸ்ரீ துர்கா மல்லேஸ்வர சுவாமி கோயிலில் சிறப்பு பூஜைகள் நடைபெற்றன. சுவாமிக்கும் அம்மனுக்கும் ஐந்து வகையான ஆரத்திகள் சமர்ப்பிக்கப்பட்டன. தொடர்ந்து, ஸ்ரீ துர்கா மல்லேஸ்வர சுவாமியின் பாரம்பரிய நகர்வலம் கோலாகலமாக நடைபெற்றது. கோயில் செயல் அலுவலர் வி.கே. சீனா நாயக் தேங்காய் உடைத்து நகர்வலத்தைத் தொடங்கி வைத்து விழாவில் பங்கேற்றார்.

கிருஷ்ணா நதிக்கரை; வேத மந்திரங்கள் முழங்க, மங்கள இசையுடன் நகர்வலம் நடைபெற்றது. சாக்ஸபோன் இசை, கேரளாவின் பாரம்பரிய பஞ்சவாத்தியம், தமிழகத்தின் நையாண்டி மேளம் மற்றும் பெண்களின் கோலாட்ட நிகழ்ச்சிகள் விழாவுக்கு மேலும் சிறப்புச் சேர்த்தன. மின்விளக்குகள் மற்றும் மணம் கமழும் மலர் மாலைகளால் அலங்கரிக்கப்பட்ட தேரைக் காண நகர்வலப் பாதை முழுவதும் ஆயிரக்கணக்கான பக்தர்கள் திரண்டனர். கிருஷ்ணா நதிக்கரை மற்றும் மலைக்கோயிலுக்குச் செல்லும் மலைப்பாதை வழியாகத் தேர் சென்றபோது, பக்தர்கள் தேங்காய் உடைத்தும் கற்பூர ஆரத்தி எடுத்தும் வழிபட்டனர். இந்திரகீலாத்ரி மலையை அடைந்ததும், கோயிலின் ராஜகோபுரம் முன்பாகப் பல்லக்கு நிறுத்தப்பட்டது. அங்கு வேத விற்பன்னர்கள் சிறப்பு வழிபாடுகளை நடத்தி மங்கள ஆரத்தி எடுத்தனர். நவராத்திரி காலத்தில் தேரில் எழுந்தருளியுள்ள தெய்வங்களைத் தரிசித்தால் வேண்டுதல்கள் நிறைவேறுவதுடன், குடும்பத்தில் செல்வமும் அமைதியும் பெருகும் என்பது பக்தர்களின் நம்பிக்கையாக உள்ளது.

பக்தி இசை: கனக துர்கா நகரில் அமைக்கப்பட்டிருந்த மேடையில் பக்தி மற்றும் கலை நிகழ்ச்சிகள் நடைபெற்றன. பாரம்பரிய பஜனைகள், பக்திப் பாடல்கள், ஹரிகதை மற்றும் செவ்வியல் நடன நிகழ்ச்சிகள் விழாவைச் சிறப்பித்தன. பி. சுவர்ணகுமாரியின் குழுவினர் பாரம்பரிய தாள பஜனையை நிகழ்த்தினர். ஜி. நாகேஸ்வர சர்மா, பி.எச்.எஸ். மணிகண்டா, எம். நாக சுனிதா, பி.வி.என். காமேஸ்வரி உள்ளிட்டோர் அம்மனின் பெருமையையும் ஸ்ரீ லலிதா சஹஸ்ரநாமத்தின் சிறப்பையும் போற்றும் பக்திப் பாடல்களைப் பாடினர். ஹரிகதை கலைஞர் ஜே. சுதாகர், திரிபுரசுந்தரி அம்மனின் மகிமையை விளக்கியதுடன், பக்த மார்க்கண்டேயரின் கதையையும் எடுத்துரைத்தார். மேலும், குச்சிப்புடி மற்றும் பரதநாட்டியக் கலைஞர்கள் மகிஷாசுர மர்த்தினி ஸ்தோத்திரம், சிவபெருமானின் ஆனந்தத் தாண்டவம் உள்ளிட்ட ஆன்மிகக் கருப்பொருள்களை மையமாகக் கொண்டு நடன நிகழ்ச்சிகளை வழங்கினர். நிகழ்ச்சிகளில் பங்கேற்ற கலைஞர்களைக் கோயில் நிர்வாகத்தினர் பாராட்டி, அம்மனின் சேஷ வஸ்திரங்கள் மற்றும் புனிதப் பிரசாதங்களை வழங்கி கௌரவித்தனர். கோயில் ஊழியர்களும் பக்தர்களும் விழாவில் பங்கேற்றனர்.