மாமல்லபுரம்: மாமல்லபுரம் கடற்கரை கோவில் வளாகத்தில் மின் விளக்குகள் பழுதடைந்து இருளில் மூழ்கியதால், சுற்றுலா பயணியர், பக்தர்கள் தடுமாறுகின்றனர்.

மாமல்லபுரத்தில் உள்ள பல்லவர் கால பாரம்பரிய நினைவுச்சின்னங்களில் குறிப்பிடத்தக்கது கடற்கரை கோவில். இங்கு ஐந்து ரதங்கள், அர்ஜூனன் தபசு மற்றும் குடைவரை கோவில்கள் உள்ளன. கடற்கரை கோவிலை பகலில் மட்டுமின்றி, இரவில் மின்னொளியிலும் காண, இரவு 9:00 மணி வரை சுற்றுலா பயணிருக்கு சுற்றுலாத் துறை அனுமதி அளித்துள்ளது. இதனால், கடற்கரை கோவில் வளாகத்தில் மின் விளக்குகள் அமைக்கப்பட்டன. இந்நிலையில், மின் விளக்குகள் பழுதடைந்து அப்பகுதி முழுதும் இருள் சூழ்ந்து காணப்படுகிறது. இதனால், அங்கு வரும் சுற்றுலா பயணியர் தங்கள் மொபைல் போன் வெளிச்சத்தில், பாறை ஓவியங்களை காண்கின்றனர். இருள் சூழ்ந்த பகுதிகளில் பாறைகற்களில் இடறியும், பாதையில் நடக்க முடியாமல் சுற்றுலா பயணியர் சிரமப்படுகின்றனர். எனவே, கோவில் வளாகத்தில், பழுதடைந்த மின் விளக்குகளை சீரமைக்க சுற்றுலா துறையினர் நடவடிக்கை எடுக்க வேண்டும் என, சுற்றுலா பயணியர் கோரிக்கை விடுத்துள்ளனர்.