கொல்கத்தா: மேற்கு வங்கத்தின் மிகப்பெரிய திருவிழாவான துர்கா பூஜை, மகா சஷ்டி நாளான வெள்ளிக்கிழமை கோலாகலமாகத் தொடங்கியது. மாநிலம் முழுவதும் அலங்கரிக்கப்பட்ட பூஜைப் பந்தல்களில் சிறப்பு சடங்குகள் நடைபெற்றன. பொதுமக்கள் பந்தல் பந்தலாகச் சென்று துர்கா தேவியைத் தரிசிக்கத் தொடங்கினர்.

துர்கா பூஜையின் தொடக்கத்தைக் குறிக்கும் வகையில், ‘கல்பரம்பா’ சடங்கு நடத்தப்பட்டது. தொடர்ந்து, துர்கா தேவியை விழாவுக்கு அழைக்கும் ‘போதன்’ சடங்கும் நடைபெறுகிறது. இந்த நாளில் தாய்மார்கள் தங்கள் குழந்தைகளின் நலனுக்காகவும், நீண்ட ஆயுளுக்காகவும் அம்மனை வேண்டி வழிபடுகின்றனர். புராண மரபின்படி, மகிஷாசுரன் என்ற அரக்கனை அழிப்பதற்காக துர்கா தேவி விழித்தெழுவதை ‘போதன்’ சடங்கு குறிக்கிறது. வழக்கமான காலத்துக்கு மாறாக, ராவணனை எதிர்த்துப் போரிடுவதற்கு முன்பு ராமர் துர்கா தேவியை வழிபட்டதாகக் கூறப்படும் புராண நிகழ்வுடன் இந்தச் சடங்கு தொடர்புடையது. இது ‘அகால் போதன்’ என அழைக்கப்படுகிறது.

கொல்கத்தாவில் குவியும் மக்கள்: காலை முதலே ஏராளமான மக்கள் பூஜைப் பந்தல்களுக்குச் சென்று அழகிய துர்கா தேவி சிலைகளையும் கலைநயமிக்க அலங்காரங்களையும் ரசித்து வருகின்றனர். பாரம்பரியமாக நடத்தப்படும் உள்ளூர் பூஜைகள் முதல் பிரம்மாண்டமான கருப்பொருள் அலங்காரங்களுடன் அமைக்கப்பட்ட பந்தல்கள் வரை அனைத்தும் மக்களைக் கவர்கின்றன. மேற்கு வங்க முதல்வர் சுவேந்து அதிகாரி, மகாஷஷ்டி திருநாளை முன்னிட்டு மக்களுக்கு வாழ்த்துத் தெரிவித்துள்ளார். அடுத்த சில நாட்களில் கொல்கத்தா உள்ளிட்ட பகுதிகளில் பந்தல்களுக்கு வரும் மக்களின் எண்ணிக்கை மேலும் அதிகரிக்கும் என எதிர்பார்க்கப்படுகிறது. பக்தி, பாரம்பரியம், கலைநயம் ஆகியவை சங்கமிக்கும் துர்கா பூஜை விழாவால் மேற்கு வங்கம் முழுவதும் கொண்டாட்ட உற்சாகம் நிலவுகிறது.