நவராத்திரியின் எட்டாம் நாள் மகா அஷ்டமி எனக் குறிப்பிடப்படுகிறது. இது துர்காதேவி அவதரித்த நாளாகும். இன்று அன்னையை, திரிசூலம் ஏந்தியவளாய், பாச அங்குசத்துடன் நரசிம்ம தாரிணியாக ரக்த பீஜனை வதம் செய்த கோலத்தில் அலங்கரித்து வழிபட வேண்டும்.

எதிரிக்கு கூட, கருணை செய்யும் இரக்கமுள்ள தெய்வமே துர்கா. துர்கையை வழிபட ஏற்ற தினம் துர்காஷ்டமி. நவராத்திரியின் எட்டாவது நாள் வரும் அஷ்டமியை, ‘துர்காஷ்டமி’ என்கிறோம். துர்கா என்ற சொல்லுக்கு, கோட்டை அல்லது அரண் என்று பொருள். ஆம்...அன்னை துர்கா, தன் பக்தர்களுக்கு துன்பம் வராமல், அரண் போல் நின்று பாதுகாக்கிறாள். இன்று மாலையில் துர்கையாக பாவித்து அம்பிகையை வணங்கலாம். கோயில்களில் துர்கையை எலுமிச்சை தீபமேற்றி வழிபட துர்கையின் அருள் நம்மை காக்கும்.. நவராத்திரியில் ஒன்பது நாளும் வழிபட முடியாதவர்கள் அஷ்டமி, நவமி, தசமி திதிகளில் வழிபட்டால் நவராத்திரி விரத பலனைப் பெறலாம். இன்று சத்துருக்களை நெருங்க விடாமல், அகழி போல் நின்று காக்கும் நரசிம்ம தாரிணியை வழிபடுவோம்.. நிம்மதியாக வாழ்வோம்!