அயோத்தி: உத்தரப் பிரதேச மாநிலம், அயோத்தியில் உள்ள ஸ்ரீ ராமர் கோவிலில் பால ராமரைத் தரிசிக்க வரும் பக்தர்களின் வசதிக்காக, எளிய தரிசன அனுமதிச் சீட்டுகளை 90 நாட்களுக்கு முன்பே முன்பதிவு செய்யும் புதிய நடைமுறையை ஸ்ரீ ராம ஜென்மபூமி தீர்த்த ஷேத்ரா அறக்கட்டளை அறிவித்துள்ளது. இதற்கு முன்பு 15 நாட்களுக்கு முன்புதான் முன்பதிவு செய்ய முடிந்தது. மேலும், தினசரி ஆன்லைன் அனுமதிச் சீட்டுகளின் எண்ணிக்கை 975-லிருந்து 2,000 ஆக உயர்த்தப்பட்டுள்ளது. பக்தர்களின் வருகை மற்றும் தேவையைப் பொறுத்து இந்த எண்ணிக்கையை மேலும் அதிகரிக்கவும் திட்டமிடப்பட்டுள்ளது.

ஏழு கட்டங்களாக முன்பதிவு: புதிய நடைமுறையின்படி, தரிசன நாளுக்கு 90, 62, 30, 14, 7, 3 மற்றும் ஒரு நாள் முன்னதாக என ஏழு கட்டங்களாக அனுமதிச் சீட்டுகள் வெளியிடப்படும். மேலும், திடீரென தரிசனத்துக்கு வர விரும்பும் பக்தர்களுக்காக, அன்றைய தினமே பெறக்கூடிய தட்கல் அனுமதிச் சீட்டுகளும் வழங்கப்படும். இதன் மூலம் ஒரே நேரத்தில் முன்பதிவு செய்ய முயற்சிப்பதால் ஏற்படும் சிரமங்கள் குறையும் என எதிர்பார்க்கப்படுகிறது. வெளியூர்களில் இருந்து வரும் பக்தர்கள் பயணச்சீட்டு, தங்குமிடம் உள்ளிட்ட ஏற்பாடுகளை முன்கூட்டியே திட்டமிட இந்த வசதி உதவும்.

ஆன்லைன் விண்ணப்பங்களுக்கு சரிபார்ப்பு: ஆன்லைன் முன்பதிவில் முறைகேடுகளைத் தடுக்கவும், தானியங்கி மென்பொருள்கள் மூலம் அனுமதிச் சீட்டுகள் பெறப்படுவதைத் தவிர்க்கவும் புதிய சரிபார்ப்பு முறை அறிமுகப்படுத்தப்பட உள்ளது. இதன்படி, முன்கூட்டியே விண்ணப்பிக்கும் அனைவருக்கும் உடனடியாக அனுமதி உறுதி செய்யப்படாது. தொழில்நுட்பச் சரிபார்ப்புக்குப் பிறகு, பொதுவாக 24 முதல் 48 மணி நேரத்திற்குள் விண்ணப்பத்தின் முடிவு தெரிவிக்கப்படும். விண்ணப்பிப்பது மட்டுமே அனுமதிச் சீட்டு கிடைப்பதற்கான உத்தரவாதம் அல்ல. அதேநேரத்தில், அன்றைய தினம் பெறப்படும் தட்கல் அனுமதிச் சீட்டுகளுக்கு இந்தக் காத்திருப்பு நடைமுறை பொருந்தாது. அவை உடனடியாக உறுதி செய்யப்படும் என அறக்கட்டளை தெரிவித்துள்ளது.

முற்றிலும் இலவசம்: ராமர் கோவிலில் சுகம் தரிசன அனுமதிச் சீட்டுகள் முற்றிலும் இலவசம் என அறக்கட்டளை தெளிவுபடுத்தியுள்ளது. அனுமதிச் சீட்டு பெற்றுத் தருவதாகக் கூறி யாரிடமும் பணம் கொடுக்க வேண்டாம் என்றும், இடைத்தரகர்களை அணுக வேண்டாம் என்றும் பக்தர்களுக்கு அறிவுறுத்தப்பட்டுள்ளது. அனுமதிச் சீட்டுக்காக யாரேனும் பணம் கேட்டால், கீழ்க்கண்ட வழிகளில் புகார் அளிக்கலாம்: உதவி எண்: 80095 22111, மின்னஞ்சல்: report@srjbtk.org இந்த உதவி எண் மற்றும் மின்னஞ்சல் புகார் வசதி அறிவிப்பு வெளியான ஒரு வாரத்திற்குள் செயல்பாட்டுக்கு வரும் எனத் தெரிவிக்கப்பட்டுள்ளது. பெறப்படும் புகார்கள் விசாரிக்கப்பட்டு உரிய நடவடிக்கை எடுக்கப்படும்.

அதிகாரப்பூர்வ இணையதளத்தில் மட்டுமே முன்பதிவு செய்யுங்கள்: பக்தர்கள் அனுமதிச் சீட்டுகளை அறக்கட்டளையின் அதிகாரப்பூர்வ இணையதளத்தில் மட்டுமே முன்பதிவு செய்ய வேண்டும் என அறிவுறுத்தப்பட்டுள்ளது.

அதிகாரப்பூர்வ இணையதளம்: https://online.srjbtkshetra.org

ஆன்லைன் முன்பதிவு முறையில் பாதுகாப்பு வசதிகள் மேம்படுத்தப்பட்டு வருகின்றன. புதிய முன்பதிவுக் கட்டங்கள், சரிபார்ப்பு நடைமுறை உள்ளிட்ட மாற்றங்கள் மென்பொருள் மேம்பாடு மற்றும் சோதனைகள் நிறைவடைந்த பிறகு படிப்படியாக அமல்படுத்தப்படும். பக்தர்களின் தேவைகள், முன்பதிவுகள் மற்றும் கோவில் நிர்வாக ஏற்பாடுகள் தொடர்ந்து கண்காணிக்கப்பட்டு, எதிர்காலத்தில் அனுமதிச் சீட்டுகளின் எண்ணிக்கையை மேலும் உயர்த்துவது குறித்தும் பரிசீலிக்கப்படும் என அறக்கட்டளை தெரிவித்துள்ளது. பக்தர்கள் சிரமமின்றி ஸ்ரீ பால ராமரைத் தரிசிக்கவும், முன்பதிவில் வெளிப்படைத்தன்மையை அதிகரிக்கவும் இந்த மாற்றங்கள் கொண்டுவரப்பட்டுள்ளன.