பாலக்காடு: பாலக்காடு சிருங்கேரி சாரதாம்பாள் கோவிலில் நவராத்திரி திருவிழா விமரிசையாக நடைபெற்று நிறைவடைந்தது.

மகாநவமி தினமான அக். 20ம் தேதி காலையில் கணபதி ஹோமத்துடன் வழிபாடுகள் தொடங்கின. தொடர்ந்து துர்கா சப்தசதி பாராயணம், ரிக், கிருஷ்ண யஜுர், சுக்ல யஜுர், அதர்வண வேத பாராயணங்கள் மற்றும் தம்பதி பூஜை ஆகியவை நடைபெற்றன. மதியம் 1:00 மணியளவில், கோவில் நிர்வாக அதிகாரி கரிம்புழை ராமன் சங்கல்பம் செய்ய மகா சண்டி ஹோமம் தொடங்கியது. ஹோமத்தையொட்டி பிரம்மாச்சாரி பூஜை, கன்யா பூஜை, சுவாஸினி பூஜை ஆகியவை நடத்தப்பட்டு, மகா பூர்ணாஹுதி மற்றும் வஸோர்தாரா பூஜைகளை கரிம்புழை ராமன் – தீபா தம்பதியினர் முன்னின்று நிறைவேற்றினர். தொடர்ந்து விஜயதசமி தினமான அக். 21 காலை 9:00 மணியளவில் வித்யாரம்பம் நிகழ்ச்சி நடைபெற்றது. இதில் கோவில் நிர்வாக அதிகாரி கரிம்புழா ராமன் குழந்தைகளுக்கு நாவிலும், நெல்லிலும் முதல் எழுத்தை எழுதி வித்யாரம்பம் செய்து வைத்தார். திரளான பக்தர்கள் கலந்துகொண்ட இந்நிகழ்வுடன் நவராத்திரி விழா நிறைவு பெற்றது.