மதுரை: மதுரை மீனாட்சி அம்மன் கோவிலில் துணை ஜனாதிபதி சி.பி ராதாகிருஷ்ணன் சுவாமி தரிசனம் செய்து வழிபட்டார். அவருடன் தமிழக ஆளுநர் ராஜேந்திர விஸ்வநாத் அர்லேகர், தமிழக சமூக நலத்துறை அமைச்சர் கே. ஜெகதேஷ்வரி, மதுரை மாவட்ட ஆட்சியர் நிஷாந்த் கிருஷ்ணா உள்ளிட்டோர் வந்திருந்தனர்.

வல்லரசாக இந்தியா: மீனாட்சி அம்மனைத் தரிசித்த பின்னர் செய்தியாளர்களிடம் பேசிய துணை ஜனாதிபதி, இந்தியா உலக வல்லரசாகவும், உலக நாடுகளுக்கு வழிகாட்டும் சக்தியாகவும் உருவெடுப்பதை யாராலும் தடுக்க முடியாது என்று தெரிவித்தார்.

பிரதமராக தமிழர் : தமிழர் ஒருவர் இந்தியாவின் பிரதமராகும் வாய்ப்பு குறித்த செய்தியாளர்களின் கேள்விக்குப் பதிலளித்த அவர், இந்தியா ஒரு ஜனநாயக நாடு என்றும், இங்கு அனைவருக்கும் சமமான வாய்ப்பு உள்ளது என்றும் கூறினார். கர்நாடகத்தைச் சேர்ந்த ஒருவர் ஏற்கெனவே இந்தியப் பிரதமராகப் பணியாற்றியுள்ளார். குஜராத்தைச் சேர்ந்த ஒருவர் தற்போது பிரதமராக உள்ளார். அதேபோல், தமிழகத்தைச் சேர்ந்த ஒருவரும் ஒருநாள் இந்தியப் பிரதமராகும் வாய்ப்பைப் பெறலாம் என்று அவர் தெரிவித்தார். மீனாட்சி அம்மனிடம் அனைவரின் நலனுக்காகவும் பிரார்த்தனை செய்ததாகக் கூறிய துணை ஜனாதிபதி, அனைவருக்கும் அம்மனின் அருள் கிடைக்க வேண்டும் என்றும் தெரிவித்தார். பின்னர் மதுரை விமான நிலையத்திலிருந்து அவர் டெல்லிக்குப் புறப்பட்டுச் சென்றார்.