திண்டிவனம்: திண்டிவனம் அடுத்துள்ள கீழ்சேவூர் கிராமத்தில் உள்ள ஜம்புநாத ஈஸ்வரர் கோவிலை புதுப்பித்து கட்டும் பணி நடந்து வருகிறது. கீழ்சேவூர் கிராமத்தில் 11ம் நூற்றாண்டை சேர்ந்த மிகப்பழமை வாய்ந்த கோகிலாம்பாள் சமேத ஜம்புநாத ஈஸ்வரர் கோவில் உள்ளது. இந்த கோவிலில் மூலவர், கோகிலாம்பாள் அம்மன் சிலைகளை தவிர பிரகாரங்களில் இருந்த விஷ்ணு, வள்ளி தெய்வானை சமேத முருகன், சண்டிகேஸ்வரர், பிரம்மா, துர்க்கை ஆகிய சிலைகள் காணாமல் போயிருந்தன. இந்த கோவிலை புதுப்பிக்க கிராம மக்கள் சார்பில், அரசிடம் கோரிக்கை வைத்தனர். அதன்படி இந்த கோவில் புதுப்பிக்க இந்து அறநிலையத் துறை மூலம் 18 லட்சத்து 40 ஆயிரம் ரூபாய் அரசு நிதி ஒதுக்கீடு செய்தது. இந்த தொகையின் மூலம் தற்போது, கோவிலை புதுப்பிக்கும் பணி நடந்து வருகிறது. மேலும் பிரகாரத்தில், முன்பிருந்த அனைத்து சிலைகள் அமைக்கும் பணியும் நடந்து வருகிறது. இக்கோவிலில் மே 1ம் தேதி கும்பாபிஷேகம் நடத்த விழா குழுவினரும், கிராம மக்களும் ஏற்பாடு செய்து வருகின்றனர்.