வேதாரண்யம்: வேதை அருகே அடுத்தடுத்துள்ள இரு கோவில்களில் உண்டியல்களை உடைத்து காணிக்கை பணம் மற்றும் அம்மன் நகையை கொள்ளையடித்த மர்ம நபர்களை போலீஸார் தேடி வருகின்றனர்.வேதாரண்யம் அடுத்த ஆயக்காரன்புலம் முதல் சேத்தியில் மழை மாரியம்மன் கோவில் உள்ளது. இங்கிருந்து 100 மீட்டர் தூரத்தில் காமாட்சியம்மன் கோவிலும் அமைந்துள்ளது. இந்த இரு கோவிலுக்குள் நேற்று முன்தினம் இரவு மர்ம நபர்கள் நுழைந்து, உண்டியல்களை உடைத்துள்ளனர். மழை மாரியம்மன் கோவில் உண்டியலில் இருந்து ஆயிரம் ரூபாய் அளவிலும், காமாட்சியம்மன் கோவில் உண்டியலில் ஐயாயிரம் ரூபாய் அளவில் காணிக்கை பணம் மற்றும் அம்மன் கழுத்தில் இருந்த ஒன்பது பவுன் நகையையும் மர்ம நபர்கள் கொள்ளையடித்துச் சென்றனர்.இதையடுத்து, கோவிலில் உண்டியல் கொள்ளை மற்றும் அம்மன் நகை பறிப்பு சம்பவம் குறித்து புகாரின்பேரில் வாய்மேடு போலீஸார் வழக்குப்பதிந்து விசாரணையை நடத்தி வருகின்றனர்.நாகையில் இருந்து கைரேகை நிபுணர்கள் வரவழைக்கப்பட்டு, சம்பவ இடத்தில், தடயங்களை சேகரித்துள்ளனர். இச்சம்பவம் அப்பகுதி பொதுமக்கள் இடையே பரபரப்பை ஏற்படுத்தியுள்ளது.