சென்னை: தமிழ்நாடு சுற்றுலா வளர்ச்சி கழகம் சார்பில், ஆடி மாதத்தில் நடத்தப்படும், 108 அம்மன் கோவில் சுற்றுலாவுக்கு, முன்பதிவு துவக்கப்பட்டு உள்ளது. தமிழகத்தில் உள்ள அம்மன் கோவில்களில், புகழ்பெற்ற, 108 அம்மன் கோவில்களுக்கு செல்லும் சுற்றுலாவை, தமிழ்நாடு சுற்றுலா வளர்ச்சி கழகம், ஆண்டுதோறும், ஆடி மாதம் நடத்தி வருகிறது. 2011 முதல், 108 அம்மன் கோவில் சுற்றுலா நடத்தப்படுகிறது. இந்த சுற்றுலா, ஒவ்வொரு வாரமும், திங்கள் மற்றும் வியாழக்கிழமைகளில், சென்னையில் இருந்து புறப்பட்டு, ஐந்தாம் நாள் இரவு, சென்னை வந்தடையும். முதல் நாள், வைத்தீஸ்வரன் கோவில்; இரண்டாம் நாள், தஞ்சாவூர்; மூன்றாம் நாள், மதுரை; நான்காம் நாள், திருச்சி ஆகிய இடங்களில், தமிழ்நாடு ஓட்டலில் தங்க வைக்கப்படுவர். இருவர் தங்கும் வசதியுடன், 5,500; சிறுவர்களுக்கு, 4,900; தனிநபருக்கு தனி அறை வசதியுடன், 6,500 ரூபாய் கட்டணம் வசூலிக்கப்படுகிறது. முதல் சுற்றுலா, ஜூலை 21ல் துவங்குகிறது. இதற்கான முன்பதிவு துவக்கப்பட்டு உள்ளது. மேலும் விபரங்களுக்கு, 2533 3444, 2533 3333, 2533 3286 ஆகிய தொலைபேசி எண்களில் தொடர்பு கொள்ளலாம். ஆன்லைன் மூலம் பதிவு செய்ய, www.ttdconline.com; மொபைல் போன் மூலம் பதிவு செய்ய, www.mttdconline.com இணையதளத்தை பார்வையிடவும்.