சபரிமலை: சபரிமலையில் மகரவிளக்கு கால நெய் அபிஷேகம் நாளையுடன் நிறைவு பெறுகிறது. 19ம் தேதி வரை தரிசனம் செய்யலாம்.14-ம் தேதி சபரிமலையில் நடைபெற்ற மகரவிளக்கு விழாவுக்காக 12-ம் தேதி பந்தளத்தில் இருந்து திருவாபரண பவனி புறப்பட்டது. பவனியில் மன்னரின் பிரதிநிதியாக ராகவவர்மா பல்லக்கில் புறப்பட்டார். பம்பை வலியான வட்டத்திற்கு பவனி வந்ததும் மன்னர் பிரதிநிதி மட்டும் அங்கேயே தங்கிவிட்டார்.

திருவாபரண பெட்டி மட்டும் சன்னிதானம் கொண்டுவரப்பட்டு, ஐயப்பனுக்கு அணிவிக்கப்பட்டு தீபாராதனை நடைபெற்றது.நேற்று மாலை ராகவவர்மா பம்பையில் இருந்து சன்னிதானம் வந்தார். அவருக்கு பெரியநடைப்பந்தலில் திருவிதாங்கூர் தேவசம்போர்டு சார்பில் மேள தாளம் முழங்க வரவேற்பு கொடுக்கப்பட்டது. பின்னர் அவர் மாளிகைப்புறம் கோயில் அருகே உள்ள மண்டபத்தில் தங்கினார்.இன்று அவர் சார்பில் களபாபிஷேகம் நடக்கிறது. தொடர்ந்து சன்னிதானத்தில் தங்கி ஐயப்பனை வழிபடுவார். 20-ம் தேதி காலை 7:00 மணிக்கு இவரது முன்னிலையில் நடை அடைக்கப்படும்.கடந்த 31-ம் தேதி தொடங்கிய மகரவிளக்கு கால நெய்யபிஷேகம் நாளை காலை 10:30 மணிக்கு நிறைவு பெறும். 19-ம் தேதி பக்தர்களுக்கு தரிசனம் செய்யலாம். ஆனால் நெய் அபிஷேகம் செய்ய முடியாது.