தொண்டாமுத்தூர்:தென்னமநல்லூரில் உள்ள பிளேக் மாரியம்மன் கோவிலில், கரகம் அழைத்தல் விழா நடந்தது. இதில் திரளான பக்தர்கள் பங்கேற்றனர்.தென்னமநல்லூரிலுள்ள பிளேக் மாரியம்மன் கோவில் திருவிழா, நேற்றுமுன்தினம் (ஜன., 15ல்) துவங்கியது. நேற்றுமுன்தினம்  (ஜன., 15ல்) காலை, அனுமதி பெறுதல், சிறப்பு அபிஷேக பூஜை நடந்தது. இரவு அம்மன் அழைத்தல், பிளேக் மாரியம்மனுக்கு திருக்கல்யாணம், முனியப்பனுக்கு விருந்து படைக்கப்பட்டது.

நேற்று (ஜன., 16ல்) அதிகாலை, 5:00 மணிக்கு நொய்யல் ஆற்றங்கரையில் இருந்து கரகம் ஜோடித்து அழைத்து வரப்பட்டது. மாலை, 5:00 மணிக்கு பொங்கல் வைத்து அம்மனுக்கு, அலங்காரம் செய்து சிறப்பு அபிஷேகம், முளைப்பாரி, மாவிளக்கு எடுத்து வரப்பட்டது. இன்று  (ஜன., 17ல்) காலை சிறப்பு அபிஷேகமும், பகல், மறுபூஜையும் நடக்கிறது.