சாத்தனூரில் இருந்த மஹாதேவய்யர், ஸரஸ்வதி தம்பதியினருக்கு 1935 ஆம் வருஷம் ஜூலை 18, ஆடிமாதம் அவிட்ட நக்ஷத்ரத்தில் பிறந்த முதல் குழந்தைக்கு ஸுப்ரமணியன் என்று பெயர் வைத்தனர். ஸுப்ரமணியன் திருவிடை மருதூரில் வேதாத்யனனம் செய்து வந்தார். மஹா பெரியவாள் ஸுப்ரமணியனை பார்த்த உடனேயே இவர் அடுத்த பீடாதிபதியாக இருக்கப் பிறந்தவர் என்று ஞானத்திருஷ்டியால் தெரிந்து கொண்டு, தனது ஸங்கல்ப்பத்தை மஹாதேவய்யரிடம் தெரிவிக்கச் செய்தார்.

ஸுப்ரமணியனும் நான் ஸந்யாஸம் தான் பெறப் போகிறேன் என்று உறுதியாக சொல்லிவிட்டார். அவருக்கு அப்பொழுது வயது 18. 22.3.1954 அன்று மஹா பெரியவாள் முன்னிலையில் ஸுப்ரமணியனுக்கு ஸந்யாஸம் நடைபெற்றது. அநேக பக்தர்கள் கூடியிருந்து இந்த வைபவத்தைப் பார்க்கும் பாக்யம் பெற்றனர். ஸ்நயாஸம் பெற்ற பிறகு ஜயேந்த்ர ஸரஸ்வதி என்று பெயர் பெற்றார். மஹாஸ்வாமிகளின் கூடவே இருந்து, ஆச்ரமதர்மங்களை நழுவாமல் அனுஷ்டித்துக் கொண்டும், ஸ்ரீசந்த்ரமவுலீஸ்வர பூஜையை செய்து கொண்டும், வேதாந்த ச்ரவணம் செய்து கொண்டும் வருகிற பக்தர்களுக்கு ப்ரஸன்னமான முகத்துடன் அனுக்ரஹம் செய்து கொண்டும் இருக்கிறார். ஆசார்யாளின் அனுமதி பெற்று பாரததேசத்தில் குமரி முதல் பத்ரி வரை பாதயாத்ரையாகவே திக் விஜயம் செய்தார். காலடி, ராமேஸ்வரம், ப்ரயாகை, காசி முதலிய ப்ரதானமான இடங்களில் ஆதிசங்கரரின் நினைவு மண்டபங்களை எழுப்பினார்.

பல கலாசாலைகளையும், பள்ளிக்கூடங்களையும் வைத்யசாலைகளையும் ஏற்படுத்தி ஜனங்களுக்கு சேவை செய்ய ஏற்பாடு செய்தார். ஜாதி மத பேதமின்றி ஏழைகளுக்கு மருத்துவம், கல்வி, திருமணத்துக்கு பொருளுதவி செய்ய வேண்டி ஜன கல்யாண் என்ற ஸ்தாபனத்தை நிறுவினார். காஞ்சிபுரத்தில் 14 வயது ஆன சங்கரநாராயணசர்மாவுக்கு ஸ்வாமிகள் 29-5-1983 அன்று ஸ்நயாஸம் கொடுத்து அவர் ஸ்ரீசங்கர விஜயேந்த்ர ஸரஸ்வதி என்ற பெயர் பெற்றார். பால பெரியவாள் என்றும் அழைக்கப்படுகிறார். பொருளாதாரத்தில் மிகவும் கீழ்நிலையில் இருந்த காஞ்சி சங்கரமடத்தை முன்னுக்குக் கொண்டு வந்த பெருமை ஸ்ரீஜயேந்த்ரருக்கே உண்டு. குருவிடம் திடமான பக்தியுள்ளவர். எனவே குருவின் சதாப்தி மஹோதஸவத்தை வெகு விமரிசையாக கொண்டாடினார்.

குருவின் சரிதத்தையும் உபதேசங்களையும் உலகமறியச் செய்தார். வேதாந்த ஸித்தாந்த நிர்த்தாரணம் செய்வதற்காக ஜகத்குரு வித்யா பீடத்தையும் காசியில் ஸ்தாபித்தார். சங்கர பாஷ்யத்துக்கு குருப்ரியா என்ற விவரணத்தையும் செய்து வெளியிட்டிருக்கிறார். அநேக கோயில் கும்பாபிஷேகங்களையும் நடத்திவைத்திருக்கிறார். இவ்வாறு அநேக லோக க்ஷேமார்த்தமான காரியங்களைச் செய்து கொண்டு எங்கும் புகழுடன் நமது ஸமகாலத்தில் ஆசார்யாள் எழுந்தருளியிருப்பது நாம் செய்த பாக்யம். ஆன்றோர் வாக்கின்படி ‘குருவருள் இல்லையெனில் அறிவோ, திறமையோ, எடுத்தகாரியத்தில் ஸித்தியோ அல்லது முக்தியோ கூட கிடைக்காது’ முற்பிறவிகளில் செய்த நல்வினைப் பயனாக ஸ்ரீகாமகோடி பீட பக்தர்களான நமக்கு ஸ்ரீசரணர்களின் திருவடி ஸம்பந்தம் பெற்ற பாக்யத்தினால் இந்த நான்கும் கிடைத்துவிட்டது என்றே பெருமையுடன் கூறிக்கொள்ளலாம். ஸ்ரீசரணர்களின் சரணாரவிந்தங்களில் பணிவுடன் நமஸ்கரித்து அவர்களின் ஆசியையும், அருளையும் பெறுவோம். அவர்கள் நீடூழி காலம் இருந்து நம்மை அனுக்ரஹிக்க அன்னை காமாக்ஷியை ப்ரார்த்திப்போமாக. (சித்தியடைந்தார் - காஞ்சிபுரம் மடம் உள்ள அதிஷ்டானம்) ஜயஜயசங்கர ஹரஹரசங்கர

பால பெரியவாள் என்று அழைக்கப்படும் ஸ்ரீசங்கரவிஜயேந்த்ர ஸரஸ்வதி ஸ்வாமிகள் 13.3.1969 ஆரணி என்ற ஊருக்கு அருகிலுள்ள தண்டலம் என்ற ஊரில் க்ருஷ்ணமூர்த்தி சாஸ்த்திரிகளுக்கும் அம்பாலக்ஷ்மிக்கும் தெலுங்கு ப்ராமண குடும்பத்தில் அவதரித்தார். பூர்வாஸ்ரம பெயர் சங்கர நாராயணசர்மா. போளூரில் காஞ்சி சங்கரமடத்தால் நடத்தப்படும் வேதபாடசாலையில், இவருடைய தந்தை ஸ்ரீக்ருஷ்ணமூர்த்தி சாஸ்த்ரிகளே ரிக்வேத அத்யாபகராக இருந்ததால், அவரிடமே ரிக்வேதம் அத்யயனம் செய்தார். பிறகு அல்லூரில் யக்ஞேஸ்வர சாஸ்த்திரிகளிடம் லீலாவதி கணிதம் கற்றார்.

காஞ்சிபுரத்தில் அனந்தஸரஸ் என்கிற புண்ய தீர்த்தக் கரையில் 14 வயது ஆன சங்கரநாராயண சர்மாவுக்கு ஸ்ரீஜயேந்த்ர ஸரஸ்வதி ஸ்வாமிகள் 29-5-1983 அன்று ஸ்யாஸம் கொடுத்தார். அப்பொழுது பல தண்டிஸந்யாசிகளும் பல பக்தர்களும் கூடியிருந்தனர் அவர்கள் இந்த வைபவத்தைப் பார்க்கும் பாக்யம் பெற்றனர். ஸ்யாஸம் பெற்ற பிறகு ஸ்ரீசங்கர விஜயேந்திர ஸரஸ்வதி என்று பெயர் பெற்றார். அந்த சமயம் ஸ்ரீஸ்ரீ மஹாஸ்வாமிகள் பாதயாத்ரை செய்து கொண்டு ஆந்த்ராவில் கர்னூலில் 21-6-1983 அன்று ப்ரவேசித்தார்கள். புதுப்பெரியவாளுடன், பாலபெரியவாளும் கர்னூல் அருகே முகாமில் இருந்தார்கள். மஹாபெரியவாள் ப்ரதோஷத்தன்று பாலபெரியவாளை வரவேற்க ஏற்பாடுகள் செய்யும்படி மடத்து சிப்பந்திகளுக்கு சொன்னார்களாம். அவர் வரும்பொழுது மல்லிகை பூவை கூடை கூடையாக அவர் சிரஸில் போடச் சொல்லியும், 108 தேங்காய் சதுர்காய் போடவும், நிறைய வேஷ்டிகள் வாங்கி அவர் வந்ததும் த்ருஷ்டி சுத்தி வேஷ்டிகளை பல்லக்கு தூக்கிக் கொண்டு வரும் போகி ஆட்களுக்கு வீசி விடவும், சொல்லியிருந்தாராம்.

மேலும் ஸ்வஸ்திவாசனம் சொல்லி அழைத்து வரச்சொன்னாராம். மாலை 7-30 மணி அளவில் பாலபெரியவாள் மஹாஸ்வாமிகள் தங்கியிருந்த மில்வாசலுக்கு வந்தவுடன் மேளவாத்யத்துடன், பூர்ணகும்பம் கொடுத்து மஹாபெரியவா சொன்னபடி வரவேற்று ஸ்வஸ்தி ஸுக்தம் சொல்லி மஹா பெரியவாளிடம் அழைத்து வந்தார்களாம். ப்ரதோஷ பூஜை முடிந்ததும் பாலபெரியவாள் மஹா பெரியவாளை வந்தனம் செய்து கொண்டார்கள். மஹாஸ்வாமிகள் சில நிமிடங்கள் பாலபெரியவாளை பார்த்த பிறகு, சில சம்பாஷணைகளும் நடந்தன. 24-7-1983 அன்று கர்னூவில் வ்யாஸபூஜை நடந்தது. 3 பெரியவாளும் சேர்ந்து செய்த முதல் வ்யாஸ பூஜை அது. பிறகு 1984ல் காஞ்சிபுரம் வந்தவுடன், பாலபெரியவாள் மஹாஸ்வாமிகளுடனும் ஸ்ரீஜயேந்த்ரஸ்வாமிகளுடனும் கூட இருந்து ஆஸ்ரம தர்மங்களை நழுவாமல் அனுஷ்டித்துக் கொண்டும், ஸ்ரீசந்த்ரமவுளீஸ்வரர் பூஜையை செய்து கொண்டும் வேதாந்த ச்ரவணம் செய்து கொண்டும் இருந்தார்.

பாலபெரியவாள் சாந்தஸ்வரூபம். இவர் அணுகுவதற்கு ஸௌலப்யமானவர். வருகிற பக்தர்களிடம் பரிவும் அன்பும் கலந்த விசாரணை செய்வார். பக்தர்களுக்கு எப்பொழுதும் ப்ரஸன்னமான முகத்துடன் அனுக்ரஹம் செய்து கொண்டு வருகிறார். தர்மத்தை ரக்ஷிக்க பற்பல ஸத்கார்யங்களை செய்து கொண்டு வருகிறார். பக்தர்களையும் ஸத்காரியங்களில் ஈடுபட ஊக்குவிக்கிறார்கள். நமது ஸ்ரீமடத்தில் ஸ்ரீசரணர்களால் தர்மம் போற்றப்பட்டும், பாதுகாக்கப்பட்டும், வளர்க்கப்பட்டும், வருகிறது. ஸம்ஸாரி ஜீவர்களை கரையேற்றக் காத்திருக்கும் ஓடம் போன்ற ஸ்ரீசரணர்களின் திருவடியைப் போற்றி வணங்குவோம். அவர்கள் நீடுழி காலம் இருந்து நம்மை அனுகிரஹிக்க அன்னை காமாட்சியை பிராத்திப்போமாக. புண்யஸ்லோகர்களாகிய குருவை நினைப்பதே மிகவும் புண்ணியமாகும்.