திருப்பதி : திருமலை ஏழுமலையானை தரிசிக்கும் ஒவ்வொரு பக்தர்களுக்கும் இலவச லட்டு வழங்க தேவஸ்தானம் முடிவு செய்துள்ளது.

திருமலை திருப்பதி தேவஸ்தானம் 2020ம் ஆண்டில் பக்தர்களுக்கு ஒரு இனிய அறிவிப்பை வெளியிட்டுள்ளது. திருமலை ஏழுமலையானை தரிசிக்க வரும் ஒவ்வொரு பக்தர்களுக்கும் ஒரு லட்டு பிரசாதம் இலவசமாக வழங்க தேவஸ்தானம் முடிவு செய்துள்ளது. இந்த புதிய அறிவிப்பு வைகுண்ட ஏகாதசி ஜன.6 முதல் அமல் படுத்தப்பட உள்ளது. தற்போது நடைபாதை வழியாக வரும் பக்தர்களுக்கு மட்டுமே தேவஸ்தானம் ஒரு இலவச லட்டை வழங்கி வருகிறது.

அதன்படி ஒருநாளைக்கு 20 ஆயிரம் லட்டு பிரசாதம் இலவசமாக வழங்கப்பட்டு வருகிறது. அனைவருக்கும் இலவச லட்டு என்ற முறையில் தினசரி 80 ஆயிரம் லட்டு இலவசமாக வழங்கப்பட உள்ளது. இதன் மூலம் ஒரு மாதத்திற்கு 24 லட்சம் லட்டு பிரசாதம் வழங்க தேவஸ்தானம் முடிவு செய்துள்ளது. மேலும் கூடுதல் லட்டு தேவைப்படும் பக்தர்களும் எவ்வித பரிந்துரை கடிதங்களும் இல்லாமல் நேரடியாக கவுன்டரில் சென்று தேவையான எண்ணிக்கையில் லட்டு பிரசாதம் பெற்றுக் கொள்ளும் வசதியையும் தேவஸ்தானம் ஏற்படுத்த உள்ளதாக அதிகார வட்டாரங்கள் தெரிவிக்கிறது.