பதிவு செய்த நாள்
29
பிப்
2020
01:02
திருவொற்றியூர் : தியாகராஜர் கோவிலில், மாசி பிரம்மோற்சவ திருவிழா, இன்று கொடியேற்றத்துடன் துவங்குகிறது.
திருவொற்றியூர், தியாகராஜ சுவாமி உடனுறை வடிவுடையம்மன் கோவில், 2,000 ஆண்டு பழமை வாய்ந்தது. இக்கோவிலில், ஆண்டுதோறும் மாசி பிரம்மோற்சவ திருவிழா, வெகு விமரிசையாக நடக்கும்.இந்தாண்டு, மாசி பிரம்மோற்சவம், இன்று இரவு கொடியேற்றத்துடன் துவங்குகிறது. தொடர்ந்து, தியாக ராஜ சுவாமி மாடவீதிஉற்சவம் நடக்கும்.மாசி பிரம்மோற்சவ நாட்களில், உற்சவர் சந்திரசேகரர், சூரிய பிரபை, சந்திர பிரபை, பூதம், சிம்மம், நாகம், ரிஷபம், அதிகார நந்தி, அஸ்தமானகிரி, யானை, புஷ்ப பல்லாக்கு, குதிரை, இந்திர விமானம் உள்ளிட்ட பல்வேறு வாகனங்களில் எழுந்தருளி, மாடவீதி உலா வருவார்.
விழாவின் முக்கிய நிகழ்வுகளான, சந்திர சேகரர் திருத்தேர் உற்சவம், மார்ச், 6ம் தேதியும், 8ம் தேதி காலை, திருக்கல்யாணம், மதியம், 63 நாயன்மார்கள் உற்சவம், இரவு, மகிழடி சேவை போன்றவை நடைபெறும். வரும், 10ம் தேதி இரவு, தியாகராஜ சுவாமி பந்தம்பறி உற்சவம், 18 திருநடனத்துடன் விழா நிறைவுறும்.பிரசித்தி பெற்ற, தியாகராஜர் கோவில் மாசி பிரம்மோற்சவ திருவிழாவில் பங்கேற்க, சென்னை மட்டுமின்றி, சுற்றுவட்டாரத்தில் இருந்து, ஏராளமான பக்தர்கள் குவிவர் என, எதிர்பார்க்கப்படுகிறது.