விருத்தாசலம்: விருத்தகிரீஸ்வரர் கோவில் மாசிமக பிரம்மோற்சவத்தில், ஆயிரக்கணக்கான பக்தர்கள் வடம்படிக்க, பஞ்சமூர்த்திகள் தனித்தனி தேர்களில் ஆடியசைந்து வீதியுலா வந்து அருள்பாலித்தனர்.

கடலுார் மாவட்டம், விருத்தாசலம் விருத்தகிரீஸ்வரர் கோவிலில், மாசிமக பிரம்மோற்சவம், கடந்த 17ம் தேதி கொடியேற்றத்துடன் துவங்கியது. தினமும் காலை ஆழத்து விநாயகர், சுவாமி, அம்பாள், சண்முக சுப்ரமணியர், சண்டிகேஸ்வரர் உள்ளிட்ட பஞ்சமூர்த்திகளுக்கு சிறப்பு அபிேஷக ஆராதனை, காலை 8:00 மணிக்கு மேல், பல்லக்கிலும், இரவு 7:00 மணிக்கு மேல், அலங்கரித்த சிறப்பு கனங்களில் சுவாமி வீதியுலாவும் நடக்கிறது.முக்கிய நிகழ்வாக, இன்று ஒன்பதாம் நாள் உற்சவமாக தேரோட்டம் நடந்தது. இதற்காக, அதிகாலை 4:30 மணிக்கு மேல், தேரடியில் அலங்கரித்து நிறுத்தி வைக்கப்பட்டிருந்த தேர்களில் ஆழத்து விநாயகர், சுவாமி, அம்பாள், சண்முக சுப்ரமணியர், சண்டிகேஸ்வரர் சுவாமிகள் எழுந்தருளினர்.  பின்னர், சிவாச்சாரியார்கள் வேதமந்திரங்கள் முழங்க, கயிலாய வாத்தியங்களுடன் தேர்களுக்கு சிறப்பு பூஜை நடந்தது. காலை 5:50 மணியளவில், ஆழத்து விநாயகர் தேரை ஆயிரக்கணக்கான பக்தர்கள் வடம் பிடிக்க, தேரோட்டம் துவங்கியது. அதன்பின், மற்ற நான்கு தேர்களும் ஒன்றன் பின் ஒன்றாக புறப்பட்டு மாடவீதிகளில் உலா வந்தது.  ஏராளமான பக்தர்கள் கலந்து கொண்டு தரிசனம் செய்தனர்.