பரமக்குடி: பரமக்குடி முத்தாலம்மன் கோயிலில் நடந்த பூச்சொரிதல் விழாவில் அம்மன் பூக்களால் அலங்கரிக்கப்பட்டார்.இக்கோயிலில் பங்குனி விழாவிற்கு முன்னதாக ஆண்டுதோறும் பூச்சொரிதல் விழா நடப்பது வழக்கம். நேற்றுமுன்தினம்மாலை 6:00 மணிக்கு நகரில் பல்வேறு இடங்களில் பூக்களை தட்டுகளில் பரப்பி அலங்கரித்து வைத்திருந்தனர். மேளதாளங்கள் முழங்க பெண்கள், இளைஞர்கள் பூத் தட்டுகளை கைகளில் ஏந்தி கோயிலுக்கு ஊர்வலமாக சென்றனர். இரவு 11:00 மணி தொடங்கி மூலவருக்கு பல்வேறு மலர்களால் அலங்கரிக்கப்பட்டார்.கோயிலில் அனைத்து பரிவார தெய்வங்களும் அலங்கரிக்கப்பட்டனர்.நேற்று காலை சிறப்பு தீபாராதனைக்கு பின் பக்தர்களுக்கு பூக்கள் பிரசாதமாக வழங்கப்பட்டது.மார்ச் 19 அன்று அம்மனுக்கு காப்பு கட்டுதல், மறுநாள் கோயில் கொடிமரத்தில் சிங்கக் கொடி ஏற்றப்பட்டு பங்குனி விழா நடக்க உள்ளது. ஏற்பாடுகளை தேவஸ்தான டிரஸ்டிகள், ஆயிரவைசிய சபையினர் செய்து வருகின்றனர்.