சென்னை : சென்னை, ஸ்ரீ ராமகிருஷ்ண மடம் சார்பில், கொரோனாவால் பாதிக்கப்பட்டு வீட்டு தனிமையில் இருப்பவர்கள் மற்றும் மருத்துவமனை ஊழியர்களுக்கு, நிவாரண பொருட்களின் தொகுப்பை இலவசமாக வழங்குகின்றனர்.

ஸ்ரீ ராமகிருஷ்ண மடம் வெளியிட்டுள்ள செய்திக் குறிப்பு:ஸ்ரீ ராமகிருஷ்ண மடம் மற்றும் ராமகிருஷ்ண மிஷன் மாணவர் இல்லம் சார்பில், பல்வேறு மாநிலங்களில் உள்ள கிளைகள் மூலம், கொரோனா நிவாரண சேவை செய்து வருகிறோம்.அந்த வகையில், சென்னையில் கொரோனா தொற்றால் பாதிக்கப்பட்டு, வீட்டு தனிமையில் உள்ளவர்களின் விபரங்களை, மாநகராட்சியிடம் பெறுகிறோம். அவர்களில், வீட்டு தனிமையில் உள்ளவர்களில் தேவைப்படுவோருக்கு, பல்ஸ் ஆக்ஸி மீட்டர், தெர்மா மீட்டர், சானிடைசர், கபசுர பொடி, வைட்டமின் மாத்திரைகள் போன்ற, 2,500 ரூபாய் மதிப்புள்ள பொருட்கள் அடங்கிய நிவாரண தொகுப்பை, ௧,௦௦௦ பேருக்கு, அவர்களது வீடுகளுக்கே அனுப்புகிறோம். அதே போல், ஸ்டான்லி மருத்துவமனை, கீழ்ப்பாக்கம் மனநல சுகாதார நிறுவனம், பொன்னேரி அரசு மருத்துவமனைகளில் பணிபுரியும் மருத்துவர்கள், செவிலியர்கள் மற்றும் மருத்துவமனை ஊழியர்களுக்கு, நீராவி இன்ஹேலர், பிளாஸ்க் போன்ற, 1,200 ரூபாய் மதிப்புள்ள பொருட்கள் அடங்கிய தொகுப்பை, 1,௦௦௦ பேருக்கு வினியோகிக்க திட்டமிட்டுஉள்ளோம்.நிவாரண உதவி தேவைப்படுவோர், 044 - 2499 0264 என்ற எண்ணில் தொடர்பு கொள்ளலாம்.இவ்வாறு அதில் குறிப்பிடப்பட்டுள்ளது.