அன்னூர்: மொண்டிபாளையம் கோவிலில் பக்தர்கள் அதிக அளவில் குவிந்தனர். மொண்டிபாளையம், வெங்கடேச பெருமாள் கோவிலில் புரட்டாசி மாத சனிக்கிழமைகளில் விசேஷ திருவிழா நடைபெறும். கோவை, திருப்பூர், ஈரோடு, நீலகிரி உள்ளிட்ட பல மாவட்டங்கள் மற்றும் வெளி மாநிலங்களில் இருந்தும் புரட்டாசி மாத சனிக்கிழமைகளில் பல ஆயிரம் பக்தர்கள் பெருமாளை தரிசித்து வந்தனர்.

கொரோனா காரணமாக கடந்த ஆண்டு புரட்டாசி திருவிழா நடைபெறவில்லை. இந்த ஆண்டு தமிழக அரசு வெள்ளி, சனி, ஞாயிறு ஆகிய மூன்று நாட்கள் கோவிலை மூட அறிவுறுத்தியது. திங்கள் முதல் வியாழன் வரை மட்டுமே கோவில் திறக்கப்படுகிறது. இதனால் நேற்று, இன்றும் பக்தர்கள் அதிக அளவில் கோவிலுக்கு வருகை தந்தனர். பெருமாளுக்கு சிறப்பு அலங்காரம் செய்யப்பட்டு இருந்தது, வெங்கடேச பெருமாள், ஸ்ரீதேவி, பூதேவி, சமேதரராக பக்தர்களுக்கு அருள்பாலித்தார். கோவில் நிர்வாகத்தினர் கூறுகையில், திங்கள் முதல் வியாழன் வரை, காலை 7:00 முதல் மதியம் 12:00 மணி வரையும், மாலை 4:00 முதல் இரவு 7:30 மணி வரையும் கோவில் விதிமுறைகளுக்கு உட்பட்டு பக்தர்கள் அனுமதிக்கப்படுகின்றனர் என்றனர்.