காரைக்குடி: குன்றக்குடியில் உள்ள வீரமாகாளியம்மன் கோவில் திருவிழாவை முன்னிட்டு பக்தர்கள் பால்குடம், தீச்சட்டி எடுத்து நேர்த்திக்கடன் செலுத்தினர்.

குன்றக்குடியில் உள்ள வீரமாகாளியம்மன் கோவில் சித்திரைத் திருவிழா ஆண்டுதோறும் சிறப்பாக நடைபெறும். இந்த ஆண்டு சித்திரைத் திருவிழா நேற்று நடந்தது. விழாவில், ஆண்கள், பெண்கள், குழந்தைகள் என ஏராளமான பக்தர்கள் பால்குடம் எடுத்தும் அலகு குத்தியும், தீச்சட்டி எடுத்தும், தீமிதித்தும் நேர்த்திக்கடன் செலுத்தினர். நேர்த்திக்கடன் செலுத்திய பக்தர்களுக்கு வழிநெடுகிலும், பக்தர்கள் மஞ்சள் நீர் ஊற்றினர். திருவிழாவை முன்னிட்டு அம்மனுக்கு சிறப்பு அபிஷேக ஆராதனைகள் நடந்தது. மாலையில் அம்மன் திருவீதி உலா நிகழ்ச்சியும் நடந்தது. விழாவில், உள்ளூர் மட்டுமின்றி சுற்றுவட்டாரத்தை சேர்ந்த ஏராளமான பக்தர்கள் கலந்து கொண்டனர். விழா ஏற்பாடுகளை கிராமத்தினர் மற்றும் விழாக்குழுவினர் செய்திருந்தனர்.