பழநி: பழநியில் அக்னி நட்சத்திர விழா நடைபெறுவதை ஒட்டி பக்தர்கள் மாலை மற்றும் காலை வேளைகளில் கடம்ப மலரைக் கையில் வைத்து கிரிவலம் வருகின்றனர்.

பழநியில் ஆண்டுதோறும் சித்திரை மாதத்தில் கடைசி ஏழு நாட்களும் வைகாசி மாதத்தில் முதல் 7 நாட்களிலும் அக்னி நட்சத்திர விழா நடைபெறும். இந்த ஆண்டு மே. 8 முதல் மே. 23 வரை இவ்விழா கடைபிடிக்கபடுகிறது. சித்திரை கழுவு எனும் இவ்விழாவில் உள்ளூர் பக்தர்கள், சேலம், திண்டுக்கல், கரூர், நாமக்கல், கோவை, உள்ளிட்ட வெளியூர் பக்தர்கள் கிரிவலம் வந்து வழிபடுவது வழக்கம். இந்த நாட்களில் மலைக்கோயில் கிரிவலம் வரும்போது மூலிகை காற்று வீசுவதால் நோய்கள் குணமாகும் என்பது ஐதிகம். இதனால் பெண்கள் கடம்ப மலர்களைத் தலையில் சூடியும், ஆண்கள் கைகளில் வைத்தும், அதிகாலை மற்றும் மாலை நேரங்களில் மலைக்கோயிலை கிரிவலம் வருவர். இன்று பவுர்ணமி மற்றும் வைகாசி ஏழு நாட்கள் மட்டும் உள்ளதால் கிரிவலம் வருபரது எண்ணிக்கை அதிக அளவில் இருக்கும் என எதிர்பார்க்கப்படுகிறது.