காஞ்சிபுரம் : பெரிய காஞ்சிபுரம், பஞ்சுபேட்டை பாண்டவ சமேத திரவுபதியம்மன் கோவில், அக்னி வசந்த விழாவையொட்டி, அர்ச்சுணன் தபசுமரம் ஏறி தவம் புரியும் நிகழ்ச்சி நடந்தது.

பெரிய காஞ்சிபுரம், பஞ்சுபேட்டை பாண்டவ சமேத திரவுபதியம்மன் கோவிலில், அக்னி வசந்த உற்சவம் கடந்த, 4ல் கொடியேற்றத்துடன் துவங்கியது. அன்று முதல் தொடர்ந்து, பகல், 2:00 மணிக்கு முத்துகணேசன் சொற்பொழிவாற்றி வருகிறார். தேவராசன் கவி வாசித்து வருகிறார். கடந்த, 15 முதல், இரவு, 9:00 மணிக்கு, குண்டையார் தண்டலம் மாரியம்மன் தெருக்கூத்து நாடக சபாவின், மஹாபாரத தெருக்கூத்து நாடகம் நடந்து வருகிறது. இதில், நேற்று காலை, அர்ச்சுனன் தபசு மரம் ஏறும் நிகழ்ச்சி நடந்தது. இதில், அர்ச்சுனன் தனது எதிரிகளை கொல்ல, பகலி என்று சொல்லக்கூடிய, வில் வற்றாக, அம்பை சிவனிடத்தில் வாங்குவதற்காக, 40 அடி உயர தபசு மரத்தில், இடது காலால் ஊன்றி, வலது காலை துாக்கி, கண்களை மூடி, கைகளைக் கூப்பி, வேண்டிக்கொண்டு மேலே ஏறி தவம் புரியும் நிகழ்ச்சி விமரிசையாக நடந்தது. விழாவில், பஞ்சுபேட்டை மற்றும் சுற்றியுள்ள பகுதியை சேர்ந்த பக்தர்கள் பங்கேற்றனர். வரும், 25ல் காலை துரியன் படுகளமும், மாலை தீமிதி விழாவும் நடைபெறுகிறது. விழாவிற்கான ஏற்பாடுகளை அருள்மிகு பாண்டவ சமேத ஸ்ரீதிரவுபதி அம்மன் இறைபணி அறக்கட்டளையினர் செய்து வருகின்றனர்.