திருக்கோவிலூர்: அரகண்டநல்லூர் அதுல்யநாதேஸ்வரர் கோவிலில் நடந்த திருவாசக முற்றோதலில் ஏராளமான சிவனடியார்கள் பங்கேற்றனர். பழம் பெருமை வாய்ந்த அரகண்டநல்லூர் அருள்மிகு சவுந்தர்ய கனகாம்பிகை சமேத அதுல்யநாதேஸ்வரர் கோவிலில் ராஜாம்பாள் சங்கரன் தலைமையில் திருக்கழுக்குன்றம் சதாசிவ பரபிரம்ம சிவனடியார் திருக்கூட்டம் மற்றும் சிவ பக்தர்களுடன் இணைந்து மாணிக்கவாசக பெருமான் அருளிய திருவாசகம் முற்றோதல் திருவிழா கோவில் வளாகத்தில் நடந்தது. காலை 7:00 மணிக்கு துவங்கி மதியம் 2:00 மணி வரை நடந்தது. சிவனடியார்கள் பலரும் பங்கேற்று சிவ தாண்டவமாடியும், திருவாசகத்தை பாடியும் உலக நன்மைக்காக முற்றோதல் விழாவை நடத்தினர். விழாவிற்கான ஏற்பாடுகளை அதுல்யநாதேஸ்வரர் ஆலய பாதுகாப்பு அறக்கட்டளை மற்றும் சிவனடியார் திருக்கூட்டம், ஊர் பொதுமக்கள் செய்திருந்தனர். பக்தர்களுக்கு அன்னப் பிரசாதம் வழங்கப்பட்டது.