கரூர் மாரியம்மன் கோவிலில், வைகாசி திருவிழாவையொட்டி, ஏராளமான பக்தர்கள் நேற்று நேர்த்திக்கடன் செலுத்த குவிந்தனர். கரூரில் பிரசித்தி பெற்ற, மாரியம்மன் கோவில் வைகாசி திருவிழா கடந்த, 8ல் கம்பம் நடுதலுடன் தொடங்கியது. தொடர்ந்து வரும், 13ல் பூச்சொரிதல் விழா, 15ல் காப்பு கட்டுதல் ஆகிய நிகழ்ச்சிகள் நடந்தன. பின், நாள்தோறும் பல்வேறு விசேஷ வாகனங்களில் அம்மன் திருவீதி உலா நடந்து வருகிறது.

நேற்று முதல், பக்தர்கள் நேர்த்திக்கடன் செலுத்தும் நிகழ்ச்சி தொடங்கியது. குறிப்பாக, கரும்பு தொட்டிலில் குழந்தைகளை படுக்க வைத்து, ஏராளமான தம்பதிகள் நேர்த்திக்கடன் செலுத்தினர். இன்று காலை, 7:00 மணிக்கு கோவில் தேரோட்டம் நடக்கிறது. அதை தொடர்ந்து, மாவிளக்கு ஊர்வலம், பால்குட ஊர்வலம், அக்னி சட்டி எடுத்தல் ஆகிய நிகழ்ச்சிகள் வெகு விமரிசையாக நடக்க உள்ளது. நாளை மறுநாள் மாலை, 5:30 மணிக்கு, கம்பம் ஆற்றுக்கு செல்லுதல் நிகழ்ச்சி நடக்க உள்ளது. மேலும் வரும் ஜூன், 2ல் பஞ்ச பிரகாரம், 3ல் புஷ்ப பல்லக்கு, 4ல் ஊஞ்சல் உற்சவம், 5ல் அம்மன் குடிபுகுதல் ஆகிய நிகழ்ச்சிகளும் நடக்கிறது.